Ўзбекистонда карантин тартиби кучайтирилган март ойининг охири, апрель ойи бошларида 1 миллион тоннага яқин цемент омборхоналарда туриб қолган. Бу ҳақда Президент Шавкат Мирзиёевнинг Фарғона вилоятига ташрифи доирасида журналистлар билан учрашган «Ўзсаноатқурилишматериаллари» уюшмаси бошқаруви раиси Ботир Зарипов маълум қилди, дея хабар бермоқда «Дарё» мухбири Миролим Исажонов.
Зарипов карантин тадбирларининг қурилиш материаллари, хусусан, цемент маҳсулотини ишлаб чиқариш ва унинг савдосига қанчалик таъсир қилгани ҳақида тўхталаркан, агар қиш ойларида бир қатор цемент заводларида газ таъминоти билан боғлиқ муаммолар бўлмаганида, омборлада тўпланиб, сотилмай қолган цемент миқдори 2-3 миллион тоннани ташкил этиши мумкин бўлганини таъкидлади.
Карантин тартиби юмшатилиб, қурилиш ишларини қайтадан бошлашга рухсат берилгач, омборларда қолиб кетган 1 миллион тонна цемент қисқа вақт ичида сотилиб кетган. «Ҳозирги пайтда цемент заводларимизда 15 минг нафар ишчи карантин қоидаларига қатъий амал қилган ҳолда ишлаб келмоқда», — деди «Ўзсаноатқурилишматериаллари» уюшмаси раҳбари.
Ўзбекистоннинг бир йиллик цемент ишлаб чиқариш қуввати 2020 йил 1 январь ҳолатига кўра, 15 миллион тоннани ташкил этади. Ботир Зариповнинг таъкидлашича, 2020 йилнинг сентябрь—октябрь ойларида ишлаб чиқариш қуввати 3 миллион тонна бўлган «Оҳангаронцемент» ишга тушади, шунингдек, умумий қуввати 3 миллион тонна атрофида бўлган бир неча кичик заводлар иш бошлаши кутилмоқда. Шу тариқа 2020 йил охирига бориб мамлакатда цемент ишлаб чиқариш қуввати 20 миллион тоннадан ошиши кутилмоқда.
Эслатиб ўтамиз, Президент Шавкат Мирзиёев Фарғона вилоятига ташрифи доирасида 5 июнь куни Фарғона туманидаги «Экокерама» компаниясида бўлган эди. Ушбу компания йилига 500 минг дона 20 турдаги сантехника маҳсулотлари ишлаб чиқариш қувватига эга, яъни Президент матбуот хизматининг қайд этишича, «импортнинг аксарият қисми ўрнини тўлдиради». Шавкат Мирзиёев корхонага маҳсулотларини сотишда кўмаклашиш бўйича мутасаддиларга кўрсатмалар берган.
Изоҳ (0)