Тошкентда 3-сонли туғруқ мажмуасида коронавирус инфекцияси аниқланиб, шу ерга олиб келинган бешариқлик ҳомиладор Г. исмли аёл 6 июнь, шанба куни фарзандли бўлди. Соғлиқни сақлаш вазирлигидан хабар беришларича, жигар етишмовчилиги билан хасталанган 21 ёшли аёл 19 май куни Россиянинг Санкт-Петербург шаҳридан чартер рейс орқали Тошкентга олиб келинган ва карантинга олинган эди.
Унда ҳомиладорлик биринчи ярми енгил даражадаги токсикоз билан кечган. Сўнгги икки ҳафта давомида эса оёғида шишлар, нафас сиқиши, ҳансираш, бурун битиши, томоқ қичишиши, таъм ва ҳид билиш сезгиларининг йўқолиши, тери сарғайиши бошланган. Ундан олинган таҳлил натижаларига кўра, аёлда коронавирус аниқланиб, 3-сонли туғруқ мажмуасига олиб келингач, биринчи навбатда таҳлиллар олинган, чуқурлаштирилган тиббий кўрик ўтказилган.
6 июнь куни ҳомиладор аёлда туғруқ бошланиб, туғруқ жараёни етти соат давом этган. Туғруқнинг иккинчи даврида аёлда нафас етишмовчилиги, ҳолсизлик, қон босимининг кескин кўтарилиши каби белгилар кучайиб, жараён намланган кислород бериш остида олиб борилган. «Тажрибали шифокорларнинг саъй-ҳаракатлари натижасида ҳомиладор аёл ўғил фарзандли бўлди. Туғруқдан кейинги даврда аёлнинг ҳаётига хавф солувчи асоратлар кузатилмади», — дейилади хабарда.
Қайд этишларича, чақалоқдан коронавирусга олинган таҳлил натижалари унда инфекция йўқлигини кўрсатган. Айни пайтда чақалоқнинг ҳолати қониқарли бўлиб, онаси билан бирга шифокорларнинг тиббий кузатувида бўлиб турибди.
Аввалроқ 10 май куни Россиядан чартер рейс билан қайтиб келган коронавирусга чалинган ҳомиладор аёл 13 май куни Тошкентда фарзандли бўлгани, 9 апрель куни пойтахтдаги касалхонага ётқизилган ҳомиладор аёлда 10 апрель куни коронавирус аниқлангани, у 1 май куни ўғил фарзандли бўлгани ҳақида хабар берилган эди. Соғлиқни сақлаш вазирлигининг 9 майдаги маълумотларига кўра, Ўзбекистонда 30 нафар ҳомиладор аёлда коронавирус аниқланган эди.
Маълумот учун, 7 июнь соат 10:00 ҳолатига кўра, Ўзбекистонда коронавирус инфекциясини юқтириб олиш билан боғлиқ 4181 та ҳолат аниқланган. Айни вақтда 896 нафар бемор даволанишни давом эттирмоқда, улардан 11 нафарининг аҳволи оғир, 3 нафарининг аҳволи ўтар оғир. 3268 нафар бемор тўлиқ соғайган, 17 нафар бемор вафот этган.
Изоҳ (0)