Фарғона водийси бўйлаб узунлиги 331 километр бўлган ҳалқа темир йўли қурилиб, электропоездлар ҳаракати йўлга қўйилади. Бу ҳақда Халқаро пресс-клубнинг 7 июнь, якшанба куни Фарғонада бўлиб ўтган сессиясида маълум қилинди.
Қўқон—Марғилон—Андижон—Наманган—Қўқон йўналишида ҳаракатланиш экспресс электропоездларда, Қўқон —Наманган—Андижон—Қўқон йўналишида эса оддий электропоездларда йўлга қўйилиши кутилмоқда.
Режага мувофиқ, экспресс электропоезд бешта бекатда, оддий электропоезд эса 35 та бекатда тўхтайди. Экспресс бир доира йўлга 5 соат 30 дақиқа вақт сарфласа, оддий электропоезд ушбу масофани 7 соат 30 дақиқада босиб ўтади.
Йиллик йўловчи оқими экспресс электропоездларда 214 мингдан 429 минг кишигача, оддий электропоездларда эса 429 мингдан 858 минг кишигача бўлиши кутилмоқда. Йўлкира нархи 5 минг сўмдан 45 минг сўмгача бўлади.
Водий ҳалқа темир йўлида қатнайдиган поезд вагонлари кондиционерлар, USB-кабеллар, Wi-Fi, буфет, мото-велосипедлар учун махсус жойлар, биоҳожатхона кабилар билан таъминланади.
Давлат-хусусий шерикчилик асосида амалга ошириладиган лойиҳа қиймати, дастлабки ҳисоб-китобларга кўра, 45 миллион долларга тенг. Водий ҳалқа темир йўли 2021 йил биринчи чорагида ишга тушиши кўзда тутилган.
Мавзуга доир: Қўқондан Андижонга электропоезд қатнай бошлади
Изоҳ (0)