Сардоба сув омборида тўғон ўпирилиши натижасида сув босган ҳудудлардаги сув ва тупроқ намуналарида бирорта касаллик ҳолати аниқланмади. Бу ҳақда Сирдарё вилояти Ветеринария ва чорвачиликни ривожлантириш бошқармаси бошлиғи Баҳром Шерназаров «Дарё» мухбири Мусулмонбек Иброҳимовга маълум қилди.
Сирдарё вилоятидаги Сардоба сув омборида тўғонида 1 май куни ўпирилиш юз берган эди. Ушбу авариядан сўнг кузатилган сув тошқини оқибатида вилоятнинг Сардоба, Оқолтин ва Мирзаобод туманларидаги аҳоли яшаш пунктлари ва экинларга зарар етган, хусусан, ўнлаб балиқчилик хўжаликларидаги балиқлар оқиб кетган.
Шундан сўнг ижтимоий тармоқларда тарқалган хабарларнинг бирида «энди икки йил давомида Сирдарёдан балиқ тутиб емаслик кераклиги» ҳақида хабарлар тарқалган. Хабарда тошқин оқибатида хонадонларнинг ҳожатхоналаридаги ахлатлар, ерга кўмилган турли касаллик ўчоқлари, мозорлар тупроқлари сувга қўшилиб кетгани, бу эса балиқлар билан боғлиқ ҳолатга салбий таъсир қилгани таъкидланади. Алоҳида қайд этилишича, тошқин оқибатида ифлосланган сувда гижжалар, гепатит С каби зарарли бактериялар бўлиши, улар балиқларни зарарлантирган бўлиши мумкин.
Бундан ташқари, Қозоғистоннинг Туркистон вилояти Ветеринария инспекцияси балиқчилик бошқармаси Мақтаарал тумани ҳудудига Ўзбекистондан оқиб келган сувдан тутилган балиқ ички органларида бир неча турдаги бактериялар топилгани ҳақида баёнот берган, шу сабабли Қозоғистон расмийлари томонидан ҳудудда балиқ овлаш тақиқланган эди. Қайд этиш жоиз, Сардоба сув омборидаги авария оқибатида Қозоғистоннинг Мақтаарал туманини ҳам сув босган, ижтимоий тармоқларда қозоғистонликлар Ўзбекистондан оқиб келган балиқларни овлаётгани акс этган видеолар тарқалган эди.
Сирдарё вилояти Ветеринария ва чорвачиликни ривожлантириш бошқармаси бошлиғи Баҳром Шерназаровнинг «Дарё» мухбирига маълум қилишича, сув тошқинидан буён ўтган бир ой ичида балиқдан заҳарланиш ҳолатлари бўйича аҳолидан ҳеч қандай эътироз бўлмаган.
«Сув ва тупроқ намуналарини мунтазам текшириб турибмиз. Ҳозирга қадар бирорта касаллик ҳолати аниқлангани йўқ ва аҳолидан ҳам балиқларни касаллангани бўйича шикоят келиб тушмади. Тошқин сув омбори атрофидаги барча балиқчилик хўжаликлари, каналлар ва сбросларни ювиб кетган. Гарчи овлаш мавсуми бўлмаса-да, аҳоли томонидан ўша сувлардан балиқ овлаш ҳолатлари кузатилмоқда. Лекин бирор жойда балиқдан заҳарланиш ҳолати аниқланмади», — деди Баҳром Шерназаров.
Унинг таъкидлашича, Сардоба, Оқолтин ва Мирзаобод туманларида аҳоли ёки ҳайвонлар орасида юқумли касалликлар қайд этилмаган. «Бу учала туманда авваллари касал ҳайвонлар кўмиладиган қабристонлар бўлмаган. Олиб борган текширувларимиз натижасида ҳайвонот дунёсида юқумли касалликлар тарқалиши аниқланмади», — деди Шерназаров.
Ветеринария ва чорвачиликни ривожлантириш давлат қўмитаси матбуот котиби Анвар Суюновнинг «Дарё»га маълум қилишича, Сардоба сув омбори тўғридан-тўғри Сирдарё дарёсидан сув олмайди, айни вақтда тошқин сувлари ҳам Сирдарёга етиб бормаган.
«Сув Жанубий Мирзачўл канали орқали Сардоба сув омборига қуйилади. Тўғон дарёдан 120—130 километр узоқликда жойлашган. 1 майдаги тошқин тўғоннинг шимол тарафидан 25—30 километр масофадаги майдонни босган. Бу — Сардоба сув омборидан Сирдарё дарёсига бир томчи ҳам сув тушмаган, дегани», — деди Суюнов.
Қўмита матбуот хизмати раҳбарининг қўшимча қилишича, тошқин 3,2 минг гектар майдондаги 62 та балиқчилик хўжалигини ювиб кетган. Дастлабки ҳисоб-китобларга кўра, балиқчилик Сардоба фалокатидан субъектлари 124 миллиард сўм зарар кўрган.
Изоҳ (0)