Собиқ Иттифоқ мамлакатларида Россиядан юбориладиган пул жўнатмаларининг сезиларли даражада пасайиши кузатилмоқда, деб ёзмоқда Bloomberg.
Агентликнинг ёзишича, Россиядан юбориладиган пул жўнатмалари яқин хориж мамлакатларининг иқтисодиётини қўллаб-қувватлаган. Баъзи мамлакатлар учун бу жўнатмалар қиймати уларда ишлаб чиқариладиган маҳсулотнинг учдан бир қисмига тенг бўлган. Ўз навбатида, Россия арзон ишчи кучи оқими туфайли бу вазиятда ютган.
Bloomberg’нинг ҳисоб-китобига кўра, жорий йилнинг март ва апрель ойларида Россиядан Ўзбекистонга жўнатилган пул маблағлари ўтган йилнинг шу даврига нисбатан деярли икки бараварга қисқарган.
Грузияда бу кўрсаткич 40 фоиз бўлса, дунёда пул ўтказмаларига энг кўп боғланиб қолган давлатлардан бири Тожикистонда 50 фоизни ташкил қилган.
«Кўплаб эҳтиёжманд оилалар учун бу даромаднинг 100 фоиз йўқотилишини англатади», — дейди Европа тикланиш ва тараққиёт банкининг Марказий Осиё бўйича иқтисодчиси Эрик Ливни.
Унинг сўзларига кўра, чегараларнинг ёпилиши баъзи мамлакатлар иқтисодиёти учун коронавирус оқибатлари таъсирининг икки ёки уч баравар ортишини англатади.
«Сиз Россияга бора олмайсиз ва уйда иш топа олмайсиз. На ҳозир, на яқин келажакда ҳам», — дейди эксперт.
Агентликнинг ёзишича, агар чегаралар яна очилса ҳам, муҳожирлар жорий йилда сўнгги ўн йилликдаги энг катта пасайишни бошдан ўтказаётган иқтисодиёт шароитида иш излайди. Дунё бўйича нефть нархининг пасайиши ва коронавирус зарбаси Россияни захиралардан фойдаланишга мажбур қилмоқда. Бу эса муҳожирлар даромадлар пасайиши ва ишсизлик ортиши шароитида иш излашга мажбур бўлишини билдиради.
Аввалроқ Жаҳон банки меҳнат муҳожирлари томонидан Ўзбекистонга юбориладиган пул оқимлари ҳажми жорий йилда 50 фоиздан кўпроққа қисқариши мумкинлигини тахмин қилганди.
Изоҳ (0)