Самарқанд вилояти Нарпай туманида 27 ёшли эркак уни Damas машинасида туртиб кетган ҳайдовчини бир мушт уриши ҳайдовчининг ўлимига сабаб бўлди. Бу ҳақда Ички ишлар вазирлиги ҳузуридаги Тергов департаменти хабар берди.
Фото: Тергов департаменти
Маълум қилинишича, 2020 йилнинг 31 май куни соат 23:30 да 27 ёшли Д.Р. Нарпай тумани «Сарбозор» маҳалласида жойлашган «Мирбозор» бозорининг олдидаги «Самарқанд» автошоҳбекатида Навоий вилоятидан келаётган почтани кутаётганди. Шу вақтида 47 ёшли Ш.У. ўзининг бошқарувидаги Damas машинасида келиб, фуқаро Д.Р.нинг ўнг елкасидан туртиб ўтган. Бунинг натижасида юзага келган жанжалда Д.Р. қўли билан ҳайдовчи Ш.У.нинг юзига бир марта урган, Ш.У. эса ердаги тошга йиқилиб тан жароҳати олган.
Damas ҳайдовчиси олган тан жароҳатлари билан Нарпай туман тиббиёт бирлашмасига мурожаат қилган.
Ҳолат бўйича Нарпай тумани ИИБ ҳузуридаги Тергов бўлими томонидан Д.Р.га нисбатан Ўзбекистон Республикаси Жиноят кодексининг 104-моддаси 1-қисми (Қасддан баданга оғир шикаст етказиш) билан жиноят иши қўзғатилган.
2020 йилнинг 2 июнь куни соат 11:30 да Ш.У. кўрсатилган тиббий муолажаларга қарамасдан, туман тиббиёт бирлашмасида вафот этган.
Шу сабабли жиноят иши Жиноят кодексининг 104-моддаси 3-қисми «д» бандига (Жабрланувчининг ўлимига олиб келган қасддан баданга оғир шикаст етказиш) қайта малакаланган. Р.Д. гумон қилинувчи тариқасида жалб қилиниб, процессуал тартибда ушланган. Ҳозирда дастлабки тергов ҳаракатлари давом этмоқда.
