Хитойда сўнгги суткада коронавирус билан касалланиш бўйича 1 та ва касаллик белгисиз ўтаётган 4 та ҳолат қайд этилди. Беморларнинг 5 нафари соғайди, вафот этиш ҳолатлари қайд этилмади, деб хабар бермоқда «РИА Новости» Хитой Соғлиқни сақлаш миллий комиссиясига таяниб.
Фото: Bloomberg
Мамлакатда умумий ҳисобда 83 022 киши коронавирусга чалинган. Беморларнинг 78 319 нафари соғайган, 4 634 нафари вафот этган. Касалхоналарда 69 нафар бемор қолмоқда.
Шунингдек, сутка давомида 4 киши инфекцияни белгисиз ташувчи сифатида қайд этилган. Шундай кишиларнинг яна 326 нафари шифокорлар назоратида бўлиб турибди.
Жанубий Кореяда эса сутка давомида 39 киши коронавирусга чалингани қайд этилиб, касалланганларнинг умумий сони 11 629 нафарга етди, деб хабар бермоқда «РИА Новости» мамлакат Соғлиқни сақлаш вазирлиги ҳузуридаги Касалликлар назорати ва профилактикаси маркази (KCDC) маълумотларига таяниб.
Май ойидан буён касалликнинг янги ўчоқлари беморлар сонининг ошишига олиб келмоқда. 28 майда кунлик касалланишлар сони 79 кишига етганди, сўнгги ҳафтада эса бу кўрсаткич 30-50 киши атрофида бўлиб турибди.
Сўнгги суткада 32 киши коронавирусдан соғайиб чиқиб, тузалганларнинг умумий сони 10 499 кишига етди. Касалликдан яна бир киши вафот этиб, вирус қурбонлари сони 273 кишини ташкил қилмоқда.
