Суратнинг муваффақиятли чиқишида бир қанча омиллар муҳим рол ўйнайди. Унда нафақат суратчи маҳоратли бўлиши, балки суратга тушишни истаган инсон ҳам умумий тушунчаларга эга бўлиши керак. AdMe нашри, суратнинг омадсиз чиқишига сабабчи бўладиган хатолар нимадан иборат эканига тўхталди.
Нотабиий жилмайиш
Кадр ўхшамаслигининг асосий сабабларидан бири камера қаршисида нотабиий кулиш ҳисобланади. Бунда кулиш учун мимикалар мажбурлаб ишлатилгани билан, кўзлар алдамайди ва натижада сурат табиий чиқмайди. Камера сохталикни эмас табиий эмоцияларни севади. Шуни инобатга олган ҳолда, табассум билан суратга тушишни истасангиз, ҳаётингиздаги кулгили ҳодисаларни эслашга уриниб кўринг.
Силлиқ сочлар
Сурат муваффақиятли чиқишини истасангиз, суратга тушишдан аввал сочингизни силлиқ қилиб текислаш ёки турмаклашдан қочинг. Чунки ҳаддан ортиқ силлиқ соч, кадрни табиий чиқмаслигини таъминлайди. Яхшиси, суратга тушишдан олдин, бошингизни эгиб, бармоқлар билан сочингизни тўғриланг кейин сочларни яна орқага ташланг. Бу ҳаракат суратга табиий кўринишда муҳрланишингизга ёрдам беради.
Қўл ҳаракатларига эътиборли бўлинг
Кадрда ҳар бир деталнинг ўз ўрни бўлгани сингари қўл ҳаракатлари ҳам суратнинг омадли ёки омадсиз чиқишида муҳим саналади. Суратга тушаётганда қўлларингизни яширманг, яхшиси тирсакдан букиб белингизга қўйинг. Бу усул сизни ихчамроқ кўрсатишга ёрдам беради.
Суратга тушиш вақти ва жойини ҳам инобатга олинг
Суратнинг муваффақиятли чиқишида ёруғликнинг ўрни беқиёс. Шунинг учун ҳам профессионал суратчилар студияларда кўп миқдорда табиий ва сунъий ёруғликдан фойдаланади. Кўчада суратга тушишни истасангиз, қуёш чиқаётган ёки ботаётган вақтни танланг, бунда суратдаги фон жуда ҳам чиройли кўринади, юзингизга эса соя тушмайди. Қоқ пешинда олинган суратда, қуёш нурларидан кўзларингиз юмилиб омадсиз кадр чиқади
Қизил лаб бўёғи
Камера қаршисида уяладиган ва ўзини ноқулай ҳис қиладиган қизларга қизил лаб бўёғи суртиш тавсия қилинмайди. Чунки кучли ҳаяжондан лаблар ёпилади ва бунинг натижасида сурат нотабиий чиқади. Шунингдек, лаби ингичка қизлар ҳам тўқ лаб бўёғи суртмагани маъқул, чунки кадрда янада ингичка кўринади. Муваффақиятли кадр учун, лабларни табиий ва чиройли кўрсатиш хусусиятига эга бўлган, рангсиз блеск суртиш тавсия этилади.
Нотўғри ракурс
Суратга қаердан, қандай туширилаётгани ҳам муҳим рол ўйнайди. Нотўғри танланган ракурс, юз шаклини кенгроқ ёки каттароқ қилиб кўрсатиши мумкин. Портрет жанрида суратга олинаётганда камера кўздан бироз тепароқда ушланиши, суратга тушаётган инсон бўлса, иягини оз-моз пастга тушириши керак бўлади.
Бош ва гавда ҳолати
Кўпчилик суратга тушаётган вақтида бошни буришга эътибор бериб, гавда ҳолатини эсдан чиқаради. Натижада сурат нотабиий чиқади. Суратга тушаётганда елкангизни бир томонга буришни ва қўлларингиз ҳолати қандай эканига эътибор беришни унутманг.
Изоҳ (0)