Шахсий ҳаёт, иш ва жамиятда муваффақиятга эришиш учун муҳим бўлган 5 тавсия

Шундай вақтлар бўладики, арзимаган қўполлик ёки ахлоқсизлик билан инсонлар ўртасидаги муносабатларга нуқта қўйилади ёки нотўғри фикр шаклланади. Элементар тамойиллар билан шахсий ҳаёт, карьера ва жамиятда муваффақиятга эришиш, атрофдагиларда ижобий хулоса қолдириш мумкин. Шуни ҳисобга олган ҳолда, кундалик ҳаётда амал қилиниши керак бўлган энг оддий, аммо керакли ахлоқ ва маданият билан боғлиқ жиҳатларга тўхталамиз.

Саломлашиш

Саломлашиш ахлоқ ва маданиятнинг энг юксак кўринишларидан бири. Дид билан кийинган, чиройли қиёфа эгаси бўлсангиз ҳам атрофдагилар билан саломлашмаслик сиз ҳақингизда етарлича тасаввур беради. Саломлашиш, муомала фақат манфаат устига қурилмаслиги, раҳбарга берилган салом, қоровул ёки оддий ишчига ҳам бирдек бўлиши керак. Одамлар билан сўрашиш уларнинг статуси билан боғлиқ бўлмаслиги, сизни қанчалик маданиятли ва тарбияли эканлигингиздан далолат беради. Саломлашиш маданияти, шунингдек, бугунги кунда долзарб бўлган ёзишмаларда ҳам акс этиши, оддий масала бўйича мурожаатда ҳам бу қоидаларга амал қилиниши керак.

Суҳбатдошга беписанд муносабатда бўлмаслик

Юзма-юз мулоқот вақтида суҳбатдошингизга беписанд муносабатда бўлманг, айтилаётган сўзларни диққат билан тингланг, керак жойда асосли фикр беринг. Суҳбат давомида телефонга чалғиманг, тўғрингиздаги инсон сизга дардини айтаётган, маслаҳат сўраётган бир вақтда телефонга қараб ўтириш ҳурматсизликни билдиради. Агар телефонда зарур ишингиз бўлса, суҳбат олдидан бироз вақт ажратиб ҳал қилиб кейин суҳбатга киришинг. Суҳбат расмий бўладими ёки дўстона фарқи йўқ, телефонингизни вақтинча овозсиз режимга қўйинг.

Кечикмаслик

Айтилган жойга кечикмасликка, вақтида боришга ҳаракат қилинг. Учрашувларга кечиккандан кўра, эртароқ борган афзал. Сизга кутиш ёқмайди тўғрими, бошқаларга ҳам шундай эканини ёдда тутиб, ўзингизни кутаётган одам ўрнига қўйиб кўринг. Шунингдек, учрашувлар тўсатдан бўлмаслигига олдиндан режалаштиришга ҳаракат қилинг.

Тартибли ташқи кўриниш

Ташқи кўринишингизга эътибор беринг. Кўринишга эътибор бериш дегани қимматбаҳо бренддан кийиниш керак дегани эмас. Тоза, дазмолланган ва тартибли либос, ғижим, ювилмаган қимматбаҳо кийим-кечакдан минг карра афзал. Кўринишга қараб кутиб олиниши, муомалага қараб кузатилиши ҳақидаги гапда жон борлигини унутманг.

Муомала маданияти

Оддий, узр, раҳмат, илтимос сўзларини ишлатишни ёддан чиқарманг. Бу лаганбардорлик эмас, маданият кўрсаткичи ҳисобланади. Сизга яхшилик қилган инсонларга самимий миннатдорчилик билдириб, бирон ерингиз камайиб қолмайди. Бошқа бир инсонни вақти келганда танқид қилиш, вақти келганда ижобий хусусиятларини тан ола билиш зарур.