Мавжуд вазиятда уйда ўтиришдан бошқа чора йўқ, лекин бу семириб кетишингизга карантин баҳона бўлолмайди. Карантин ҳали қанча давом этиши аниқ бўлмаслиги мумкин, лекин кўп ейиш ва кам ҳаракатнинг оқибати нима билан якун топиши ўзингизга яхши аён.
Ҳаётингиз ва саломатлигингиз олдидаги масъулиятни ҳис қилинг
Ишхонадагилар, курсдош ёки танишлар учун эмас, аввало, ўзингиз, саломатлигингиз ва соғлом ҳаёт кечиришингиз учун спорт билан шуғулланишни бошланг. Сериал, кино, телефон — буларнинг бари вақт ўтказиш учунгина хизмат қилади. Ўз ҳаётингиз, танангиз олдидаги масъулиятни ҳис қилиб, ҳозироқ ўз устингизда ишлашга киришинг.
Мақсад — энг катта мотивация
Жисмоний машқларни бошлаш учун мотивация керак дейсизми? Натижаси кўзни қувонтириши, инсон ўзини қушдек енгил ҳис қилиши мумкин бўлган мақсаддан бошқа яна қандай мотивация бўлиши мумкин? Сиз яхшилаб ўрнашиб олган диван, қўлингиздан тушмайдиган телевизор пульти, ёғ босишдан келиб чиқадиган юрак-қон томир касалликлари ёки қандли диабетга чалинганингизда сизга ҳеч қандай ёрдам бермайди.
Жуда банд бўлсангиз ҳам соғлигингиз учун 1 соатни аяманг
Телефондан ҳеч ҳам айрилгиси келмайдиганлардан бўлсангиз, унда ушбу қурилмани ўз мақсадингиз йўлида ишлатинг. Онлайн спорт машқларини кузатиб, уларни такрорланг. Жисмоний машқлар кетма-кетлигини ўзида жамлаган ва кунига неча дақиқа, неча мартадан, қандай машқ қилиш кераклигини кўрсатиб турадиган мобил иловаларни юклаб олинг ва энг асосийси, 24 соатдан атиги бир соатни соғлиғингиз учун сарфланг.
Ўзингизни мажбурламанг, онгли равишда бажаринг
Жисмоний машқ бажариш бу — мажбурият эмас, хоҳиш-истаксиз кўзланган мақсадга эришиб бўлмайди. Шунинг учун спорт билан керакли эканини англаб, чин кўнгилдан хоҳлаб шуғулланинг.
Тез таслим бўлманг
Мақсадга дарҳол эришиб бўлмаслигини, натижа бўлиши учун вақт кераклигини ёдда тутинг. Катта мақсадга эришишни кичик-кичик ҳаракатлардан бошланг. Бугун 10 та бажарган машқингизни эртага 20 та бажаринг, индинига яна кўпайтиринг, шунда организм зўриқмайди ва аста-секин жараёнга мослашиб боради.
Ҳам танани, ҳам мияни чиниқтиринг
Спортни мусиқа ва аудио китоблар тинглаш билан бирга олиб боринг. Севимли қўшиғингизни тинглаб машқ қилиш сизга завқ берса, аудио китоб ва спортни бирлаштириш тана ва мияни бир вақтда чиниқтиради.
Спортга оила аъзоларингиз ва дўстларингизни жалб қилинг
Бир ўзингизга спорт билан шуғулланиш зерикарли бўлса, оила аъзоларингиз билан ёки онлайн дастурлар орқали дўстларингиз билан бажаринг. Кўпчилик билан бажарилган машқлар қизиқ ва мароқли бўлади.
Изоҳ (0)