Ўзбекистонда муҳтож оилаларга 1 триллион сўмдан ортиқ маблағ ажратилади
Шавкат Мирзиёев раислигида бўлиб ўтган камбағалликни қисқартириш масалаларига бағишланган йиғилишда аҳолини ижтимоий қўллаб-қувватлаш масалаларига алоҳида эътибор қаратилди. Бу ҳақда Президент матбуот хизмат хабар қилган.
Хабарда қайд этилишича, карантиннинг биринчи кунларидан бу борада зарур чоралар кўрилиб, ижтимоий нафақа олувчилар сони 10 фоизга оширилган.
Боқувчисини йўқотган оилалар сони 155 минг, 5 нафардан ортиқ фарзанди бор кам таъминланган оилалар сони 81 минг, ёлғиз яшовчи кексалар 16 минг нафарни ташкил этмоқда. Лекин ажратилаётган ижтимоий ёрдамлар эҳтиёжмандларга тўлиқ етиб бормаётган ҳолатлар ҳам кўп.
Мавзуга доир: Коронавирус пандемияси Ўзбекистонда 450 мингга яқин оиланинг даромадига жиддий таъсир қилиши мумкин
Пандемия даврида аҳолини ижтимоий қўллаб-қувватлаш бўйича қабул қилинган қарорлар доирасида йил якунига қадар қўшимча 235 мингдан зиёд оилага моддий ёрдам ажратилиши қайд этилди.
