Тошкент вилояти Давлат санитария-эпидемиология назорати бошқармаси Бўка тумани филиали мудири вазифасини бажарувчи фуқаро пора олаётганида ушланди. Бу ҳақда Бош прокуратура «Дарё»га маълум қилди.
Маълумотларга кўра, Бош прокуратура ҳузуридаги Бўка туман бўлими ҳамда бошқа ҳуқуқни муҳофаза қилувчи органлар ходимлари билан ҳамкорликда фуқаро Қ.Қ.нинг мурожаати бўйича тезкор тадбир ўтказилган.
Таъкидланишича, Давлат санитария-эпидемиология назорати бошқармаси Бўка тумани филиали мудири вазифасини бажарувчиси Н.Р. фуқаро Қ.Қ.га нисбатан қўлланилган маъмурий жарима миқдорини камайтириб бериш ҳамда Damas русумли автомашинасини жарима майдончасидан чиқариб бериш эвазига, таъмагирлик йўли билан 400 минг сўм пора талаб қилиб олган вақтида ашёвий далил билан ушланган.
Мазкур ҳолат юзасидан Н.Р.га нисбатан Жиноят кодексининг 210-моддаси («Пора олиш») 2-қисми «в» банди билан жиноят иши қўзғатилиб, тергов ҳаракатлари ўтказилмоқда.
Изоҳ (0)