Замонавий дизайнерлар томонидан тақдим қилинган коллекция ва трендларга назар ташланса, ўтган асрдан илҳом ва андоза олинганини пайқаш мумкин. Қуйида эътиборингизга 40 йилларда урф бўлган ва орадан шунча вақт ўтиб яна долзарб бўлган трендларга тўхталамиз.
Қалам кўринишини эсга солувчи юбка
Фото: Getty Images
Нозик жинс вакиллари қоматини янада чиройли қилиб кўрсатадиган мазкур юбка, 2020 йилнинг баҳор-ёз мавсумида ҳар доимгидан ҳам долзарброқ. Қалам кўринишини эсга солувчи юбкани, офис учун пошнали туфли ва блузка билан, сайр учун топ ва кроссовка билан мослаш мумкин.
Кардиган
Фото: Getty Images
40 йилларда, аёллик нафосатини акс эттирадиган либослар, хусусан, кардиганлар урфда бўлган. Кардиган билан нафақат мода борасида ўзига хос дидли французлар, балки нафисликни қадрловчи ҳар қандай аёл-қизлар образ яратишни хуш кўрган.
Миди узунлигидаги либослар
Фото: Getty Images
Башанг ва назокатли кўрсатиш хусусиятига эга бўлган миди, яъни тиззадан пастга тушиб турувчи кўйлакларни минимал услубдаги босоножка ёки спорт услубидаги оёқ кийим билан ҳам мосласа бўлади. Винтаж услубидаги кўзойнак тақилса борми, сиз мода борасида дидингиз чакки эмаслигини исботлаган бўласиз.
Лофер
Фото: Getty Images
Мазкур йилнинг энг долзарб пойабзали ҳисобланган лоферни, шим, юбка ҳатто шортик билан ҳам кийса бўлади. Лофер танлаганда унинг қулайлигига эътибор беринг. Асосан қора, жигарранг ва кул рангидан танлаш ва у билан оқ, олча ранг либосларни мослаш тавсия қилинади.
Хол-хол принтли либослар
Фото: Getty Images
Ишонч билан айтиш мумкинки, хол-хол принтли либослар ҳеч қачон модадан қолмайди. 40 йиллардаги мода чиқишлари ва журналлари кўздан кечирилса, бугунги кунда ҳам талаб асло камаймаган мазкур принтли либослар билан ўзига хос образлар яратилганини кўриш мумкин. Хол-хол принтли либос билан катак-катак, йўл-йўл принтли костюм, пиджак ёки кардиган мослаш, аммо ошириб юбормаслик учун ортиқча аксессуарлардан қочиш тавсия қилинади.
