Транспорт вазирлиги экспортёр корхоналарни қўллаб-қувватлаш, уларга шарт-шароит яратиб бериш мақсадида UZ-Segong ва XinFergana корхоналари томонидан экспорт учун тайёрланган 50 тонна гилос маҳсулоти 1 июнь куни Фарғона халқаро аэропортидан Кореянинг Сеул халқаро аэропортига тўғридан-тўғри етказилиши таъминлангани ҳақида хабар қилди.

Фото: Транспорт вазирлиги

Хабарга кўра, Фарғона вилоятидан хорижга ҳўл мевалар экспорти билан шуғулланаётган RTL logistics, UZ-Segong, XinFergana корхоналари томонидан бўлган мурожаатлар ва ушбу корхоналарнинг фаолияти Транспорт вазирлигининг аэропортларни ривожлантириш ва ерусти таъминоти бошқармаси мутахассислари томонидан атрофлича ўрганиб чиқилган. Шунингдек, экспортёр корхоналар вакиллари билан бўлиб ўтган учрашувда ҳўл меваларни Фарғона вилоятидан Қамчиқ довони орқали Тошкент халқаро аэропортига юк машиналарида етказиб бориш жараёнидаги қийинчиликлар, қолаверса, ушбу жараён транспорт харажатларининг ортиб кетишига, бу эса ўз навбатида экспортга юборилаётган маҳсулотлар нархининг кўтарилишига сабаб бўлаётгани туфайли ушбу ҳудуднинг ўзидан юк авиақатновларини ташкил этиш масаласи ўрганилган.

Фото: Транспорт вазирлиги

Мазкур жараённи муваффақиятли амалга ошириш мақсадида Наманган халқаро аэропортидан ҳаво кемасига юкларни ортиш учун ишлатиладиган махсус техника воситалари (Тriple) ҳамда Тошкент халқаро аэропортидан эса махсус европаддонлар Фарғона халқаро аэропортига олиб келинган. Самолёт етиб келгунига қадар эса аэропортнинг юк ташувлари бўлими ходимларига махсус техникадан фойдаланиш ва юкларни ортиш машғулотлари ўтказилган.

Фото: Транспорт вазирлиги

Барча ташкилий масалалар муваффақиятли амалга оширилиб, 50 тонна гилос маҳсулотини Сеул шаҳрига юбориш амалиёти омадли якунланган. Экспорт билан шуғулланувчи тадбиркорларнинг вилоятлараро юк ташиш борасида юзага келаётган муаммоларини бартараф этиш ва хорижга тўғридан-тўғри Фарғона халқаро аэропортидан юкларни юбориш имкони яратилди, дейилган хабарда.

Фото: Транспорт вазирлиги

Фарғона халқаро аэропортидан юкларни хорижга юбориш амалиёти 17 йил аввал тўхтатилган эди.

Аввал Фарғонадан Жанубий Кореяга юк самолётида гилос юборилгани ва қарама-қарши йўналишда Тошкентга Сеулдан коронавирусга қарши курашда фойдаланиш учун инсонпарварлик ёрдами жўнатилгани хабар қилинганди.