Қирғизистон билан чегарадаги низо оқибатида Боткен вилоятида уй ва омборхона ёниб кетган

Қирғизистонда Боткен вилоятининг Қадамжой туманида иккита ёнғин ҳолати кузатилган. Бу ҳақда Қирғизистон Фавқулодда вазиятлар вазирлигига таяниб «Turmush.kg» хабар бермоқда.

Хабарга кўра, «Бирлик» фуқаролар йиғинининг Чечме қишлоғида 40 квадрат метр майдондаги уй, шунингдек, 60 квадрат метр хонадон омборхонаси ёниб кетган. Ёнғин сабаблари аниқланмоқда.

Кейинроқ Қирғизистон Фавқулодда вазиятлар вазирлиги 31 май куни қирғиз-ўзбек чегарасидаги Қадамжой туманининг Чечме қишлоғидаги 60 квадрат метр майдонга эга омборхона ёниб кетганини тасдиқлаган.

Эслатиб ўтамиз, Ўзбекистон ҳамда Қирғизистон давлат чегарасидаги ҳудудда 2020 йил 31 май куни Чечме булоғи сувидан фойдаланиш борасида икки давлат фуқаролари ўртасида жанжал келиб чиққан. Ушбу сув ўзани Боткен вилоятидаги Қадамжой туманининг Бирлик айил аймоғида жойлашган.

Қирғизларнинг Чечме қишлоғи ҳамда Фарғона вилоятининг Сўх туманидаги Чашма қишлоғи аҳолиси ўртасидаги можаро, тахминан, соат 12:30 ларда бошланган ва икки томон бир-бирларига турли буюмлар, тошлар улоқтирганди. Ўзбекистон ДХХ Чегара қўшинлари Чашма булоғи олдида 31 май, якшанба куни икки мамлакат фуқаролари ўртасида зиддият келиб чиққанини тасдиқлаган ва вазият тўлиқ назоратга олингани, можаронинг сабаб ҳамда оқибатларини бартараф этиш бўйича тегишли чоралар кўрилаётганини билдирган. Қирғизистон бош вазири ўринбосари Акрам Мадумаров эса вазиятнинг кескинлашувига йўл қўйилмаслигини қайд этган.

Кейинчалик 31 май куни юз берган можаро оқибатида 187 нафар ўзбекистонлик касалхонага ётқизилгани, можаро оқибатида Ўзбекистон ҳудудидаги учта хонадонда ёнғин юз бергани, бош вазир Абдулла Арипов зарар кўрган оилалар хонадонларининг қисқа муддатда тиклаб берилишини айтгани ҳақида хабарлар берилган. Шавкат Мирзиёев чегарадаги воқеа юзасидан Қирғизистон президенти билан мулоқот қилган.