ДХХ ходимларининг Бош прокуратура ҳузуридаги Департамент вакиллари билан ҳамкорликда Андижон вилоятида ўтказган тезкор тадбир давомида яна бир фирибгарлик жинояти фош этилди. Бу ҳақда «Дарё»га ДХХдаги манбалари хабар берди.
Тезкор тадбир давомида Андижон шаҳрида яшовчи Б.М. Жалақудуқ туманида истиқомат қилувчи, муқаддам таълим соҳасида ишлаган фуқародан 1500 долларни олган вақтида ушланган.
Аниқланишича, у Андижон давлат университетида ишловчи таниши орқали Хўжаобод туманида педагог ходимлар учун имтиёзли кредит асосида берилиши мўлжалланган 2 сотихлик намунавий уйлардан олишга кўмаклашишни ваъда қилиб, жабрланувчидан 3000 доллар талаб қилган ва келишилган сумманинг ярмини аввалдан олмоқчи бўлган.
Ҳозирда мазкур ҳолатлар юзасидан Жиноят кодексининг 168 (Фирибгарлик ), 28 (Жиноят иштирокчилари) ва 211-моддалари (Пора бериш)га асосан жиноят ишлари қўзғатилиб, тергов ҳаракатлари доирасида ушбу ишларга алоқадор бошқа шахсларни аниқлаш бўйича тегишли чора-тадбирлар амалга оширилмоқда.
Изоҳ (0)