Тошкент вилоятида карантин бошидан буён 15560 та автотранспорт жарима майдонига жойлаштирилгани маълум бўлди

Тошкент вилояти ИИББ томонидан 31 май кун ўтказилган тадбирлар давомида фуқаролар томонидан карантин қоидаларини бузиш билан боғлиқ 1 722 та ҳолат қайд этилди.

Бошқарма матбуот хизматининг хабар беришича, аниқланган ҳолатларнинг 400 га яқини Зангиота ва Қибрай туманлари ҳамда Ангрен шаҳрига тўғри келади.

Шунингдек, икки кун давомида 3 113 нафар фуқаро карантин қоидаларини бузмаслик юзасидан расмий огоҳлантирилган.

Хусусан, ИИББ ЙҲХБ инспекторлари 31 май куни 141 нафар ҳайдовчи карантин қоидаларини бузганини аниқлаган. Ундан бир кун аввал 108 та шундай қоидабузарликлар қайд этилган. Транспорт воситасини ҳужжатсиз бошқариш бўйича 31 май куни 463 та, 30 май куни эса 265 та ҳолат аниқланган.

Шунингдек, транспорт воситасини маст ҳолда бошқариш билан боғлиқ 31 май куни 7 та, 30 май куни эса 15 та ҳолат аниқланган. Шу ва бошқа турдаги қоидабузарликлар билан карантин тадбирлари бошидан ҳозирги кунга қадар 15 560 та автотранспорт воситалари жарима майдонига жойлаштирилган.

Барча аниқланган қоидабузарликлар юзасидан қонунда белгиланган тартибда чора кўрилган.

Қайд этилишича, 1 июнь кунидан бошлаб, Тошкент вилояти ИИББ ва ҳамкорликдаги ташкилотлар вакилларидан тузилган махсус гуруҳ томонидан карантин қоидаларига амал қилиш юзасидан «қизил» тоифага киритилган ҳудудларда кучайтирилган рейд тадбирлари ўтказилади.

Эслатиб ўтамиз, Республика махсус комиссиясининг қарори билан амалдаги карантин талаблари 2020 йил 15 июнга қадар узайтирилган.