Хитойлик олимлар коронавирус кўршапалакларда пайдо бўлганини тасдиқлади, бироқ у одамга бошқа ҳайвондан юққан
COVID-19 пандемиясини келтириб чиқарган SARS-CoV-2 коронавирусининг асосий манбайи Ухандаги денгиз маҳсулотлари бозори эмас. Daily Mail’нинг ёзишича, бу ҳақда Хитой Касалликларни назорат қилиш ва олдини олиш маркази маълум қилган.
Ухандаги денгиз маҳсулотлари бозоридаги ҳайвонлардан олинган намуналарнинг генетик тадқиқоти уларда COVID-19 йўқлигини, демак, улар инфекция манбайи бўлолмаслигини кўрсатган.
Марказ директори Гао Фунинг сўзларига кўра, бозор коронавирус сабабчиси эмас, балки унинг «қурбонларидан бири» бўлган. Шу билан бирга, хитойлик олимлар ўтказган тадқиқот натижалари вирус кўршапалакларда пайдо бўлгани ҳақидаги тахминни тасдиқлади. Аммо у одамга «оралиқ ҳайвон» орқали юққан. Биринчи бемор касалланган жойнинг манзили эса номаълум.
Жоржтаун университети зоологи Колин Карлсоннинг таъкидлашича, Ухань денгиз маҳсулотлари бозори коронавируснинг кенг тарқаладиган жойига айланган — бир киши бирданига кўплаб одамларга касаллик юқтирган.
26 май куни ЖССТ коронавируснинг келиб чиқишини ўрганиш учун Хитойга миссия юборишини маълум қилганди. Унда турли давлатлардан келган вакиллар ҳам бўлади. ЖССТнинг фавқулодда вазиятлар дастури раҳбари Майк Райаннинг айтишича, Хитой ҳукумати чет эллик олимларга вируснинг келиб чиқишини аниқлашга ёрдам беришга тайёрлигини билдирган.
Эслатиб ўтамиз, АҚШнинг Fox News телеканали коронавируснинг Уханда лаборатория шароитида яратилганини тахмин қилган. Дональд Трамп ҳам коронавирус лабораторияда яратилганини исботловчи далиллари борлигини билдирган. АҚШ давлат котиби Майкл Помпео Хитой касаллик тарқалиши юзасидан муҳим ахборотга эга бўлгани, аммо уни ўз вақтида ошкор қилмаганини айтган.
Бунга жавобан ЖССТ АҚШ коронавирус лабораторияда яратилгани тўғрисида ҳеч қандай маълумот тақдим этмаганини, коронавирус Хитой лабораторияларида пайдо бўлгани тўғрисидаги баёнотни спекулятив деб айтган.
Австралиянинг The Daily Telegraph нашри АҚШ, Буюк Британия, Канада, Австралия ва Янги Зеландия махсус хизматларини бирлаштирувчи «Беш кўз» разведка альянси томонидан тайёрланган 15 варақли ҳисоботга таяниб, Хитой COVID-19 коронавирус инфекциясига оид далилларни қасддан йўқ қилиб юборганини ёзганди.
The Guardian ғарб махсус хизматларида Хитой коронавирус ҳақидаги маълумотларни яширганлигига оид далиллар йўқлигини, Австралия газетадаги маълумотлар «Беш кўз» разведка альянсидан эмас, АҚШнинг ўзидан келганини билдирган.
Американинг The Washington Post газетаси эса коронавирусга чалиниш бўйича дастлабки ҳолат ҳақида яна турли назариялар тарқалишининг олдини олиш мақсадида Хитой ҳукуматини биринчи одам касалланиши тўғрисидаги маълумотларни ошкор қилишга чақирган.
