Ўзбекистонда 5 июндан футбол беллашувларини давом эттиришга рухсат берилди
Ўзбекистонда «яшил» ҳудудларда томошабинларсиз футбол баҳсларини 5 июндан давом эттиришга рухсат берилди. Бу ҳақида Республика махсус комиссияси ахборотида эълон қилинди.
Унга кўра, 2020 йил 5 июндан бошлаб Ўзбекистон профессионал футбол лигаси чемпионатларини томошабинлар иштирокисиз давом эттиришга рухсат берилади.
«Футбол бўйича халқаро ва ички мусобақаларга юқори даражада тайёргарлик кўриш ҳамда уларда қатнашиш мақсадида профессионал футбол клублари ўз ўқув машғулотларини санитария қоидалари, нормалари ва гигиена нормативларига мувофиқ ҳолда бошлашлари мумкин», — дейилади комиссия хабарида.
Қайд этиш жоиз, Ўзбекистонда коронавирусга чалинишнинг илк ҳолати 15 март куни қайд этилганди. Шундан сўнг мамлакатдаги бошқа спорт турлари қатори футбол бўйича мусобақалар ҳам тўхтатиб қўйилганди.
Маълумот учун, 2020 йилги Суперлига баҳсларида 3 та тур ортда қолган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
