Жиззах вилоятида 29 ва 30 май кунлари ҳайдовчиларнинг ухлаб қолиши билан боғлиқ иккита йўл-транспорт ҳодисаси юз берди. Бу ҳақда Жиззах вилояти ИИБ ЙҲХБ хабар бермоқда.

Зоминда юз берган ЙТҲ.

Кадр: Жиззах вилояти ИИБ ЙҲХБ

Биринчи ҳодиса 29 май куни соат 18:00 ларда Зомин тумани ҳудудидан ўтган Жиззах–Қўқон А-376 автомобиль йўлининг 251-километрида содир бўлган. Даштобод—Жиззах йўналишида ҳаракатланиб келаётган Ғаллаорол туманида яшовчи 1970 йилда туғилган Б.С. Nexia автомобили рул бошқарувида ухлаб қолиши оқибатида йўналиши бўйича йўл четида велосипедда ҳаракатланаётган 1994 йилда туғилган А.К.ни уриб юборган.

Зоминда юз берган ЙТҲ.

Кадр: Жиззах вилояти ИИБ ЙҲХБ

ЙТҲ оқибатида 26 ёшли А.К. чап ўмров суягининг очиқ синиши ташхиси билан РШТЁИМнинг Жиззах филиали Травматология бўлимига ётқизилган.

Иккинчи ЙТҲ 30 май куни соат 03:40 лар атрофида Тошкент–Термиз М-39 автомобиль йўлининг 1024-километрида юз берган. Самарқанд–Тошкент йўналишида сурхондарёлик 1994 йилда туғилган А.Й. Nexia автомобилини бошқариб бораётиб, рулда ухлаб қолиши оқибатида ўзидан олдинда бўлган «Камаз» юк машинаси тиркамасининг орқа чап қисмига урилган.

Кадр: Жиззах вилояти ИИБ ЙҲХБ

ЙТҲ оқибатида Nexia йўловчилари 1996 йилда туғилган Ў.Т. исмли аёл ва унинг 2018 йилда туғилган қизи Н.Й. РШТЁИМнинг Жиззах филиалининг жонлантириш бўлимига ётқизилган.

Кадр: Жиззах вилояти ИИБ ЙҲХБ

Жиззах вилояти ҳудудида илгари ҳам ҳайдовчиларнинг ухлаб қолиши оқибатида ЙТҲлар кузатилганди. 29 апрель куни М-39 автомобиль йўлининг 967-километрида Matiz ҳайдовчиси ухлаб қолиши оқибатида машина ағдарилиб кетган, ҳайдовчи ва 13 ёшли йўловчи вафот этганди. 8 май куни М-39 автомобиль йўлининг 1029-километрида Cobalt ҳайдовчиси ухлаб қолиши оқибатида машина йўлдан чиқиб кетиб ағдарилган ва ҳайдовчи вафот этганди.