Ўзбекистонда 1 июндан ички туризм ўз фаолиятини қайта бошлайди

1 июндан карантин чекловлари бўйича «яшил» ва «сариқ» деб белгиланган ҳудудларда ички туризмнинг амалга оширилишига рухсат берилади. Бу 28 майда имзоланган «Коронавирус пандемиясининг туризм соҳасига салбий таъсирини камайтириш бўйича кечиктириб бўлмас чора-тадбирлар тўғрисида»ги Президент фармонида кўзда тутилган. Бу ҳақда «Gazeta.uz» бош вазир ўринбосари ва Туризмни ривожлантириш давлат қўмитаси раиси Азиз Абдуҳакимовга асосланиб хабар қилган.

Ушбу санадан бошлаб юқорида қайд этилган тоифага кирувчи ҳудудларда соҳа ташкилотлари — туроператорлар, туристик агентликлар, маданият объектлари, маданий ёдгорликлар ва бошқа объектлар белгиланган санитар-эпидемиологик меъёрлари ва талаблар асосида иш бошлайди.

Бундан ташқари, рўйхат асосида рухсат берилган фуқаролар учун Ўзбекистондан ташқарига чиқишни босқичма-босқич амалга ошириш кўзда тутилган.

«Ўзбекистонда туроператорларнинг 63 фоизи ва меҳмонхона ва хостелларнинг 81 фоизи ўз фаолиятини вақтинча тўхтатган. Бу 250 минг нафар фуқаронинг даромадларига салбий таъсир кўрсатган», – деди Азиз Абдуҳакимов.

Бош вазир ўринбосарининг сўзларига кўра, 2019 йилда Ўзбекистонга 6,7 миллион нафар турист ташриф буюрган, мамлакатнинг экспортига қўшилган улуш миқдори 1,3 миллиард АҚШ долларини ташкил қилган. Шунингдек, туризмда фуқароларнинг бандлигини таъминлаш ҳам етакчи ўринларни эгаллаган.

«Европа ва Осиёнинг кўплаб мамлакатлари коронавирус пандемияси инқирозида босқичм- босқич чиқмоқда ва туризм бозорларини очмоқда. Давлат раҳбарининг топшириғига кўра, бошқа давлатларда қўлланилаётган хавфсизлик чоралари таҳлил қилиниб, аввало, санитар-эпидемиологик вазият яхшиланган жойларда янги касалланиш ҳолатлари қайд этилишига қарши жиддий кураш олиб борилмоқда. Президент топшириғига кўра Ўзбекистонда ички туризмни босқичма-босқич очиш бўйича биринчи босқичда ва кейинги қадамларда эпидемиологик вазиятдан келиб чиқиб маҳаллий ҳамда халқаро авиақатновларга рухсат берилади», — деган Абдуҳакимов.

Президент республиканинг тоғли ҳудудларида ва кўл бўйларида енгил конструкцияли дам олиш масканларини қуришни таклиф этган. Унга кўра ҳокимлар томонидан дам олиш базаларининг жойлашуви аниқланиб, улар интернетга юкланади.