Андижон вилоятида яшовчи икки нафар юк машинаси ҳайдовчисида коронавирус аниқлангани сабабли қариб 100 киши карантинга олинган. Бу ҳақда Соғлиқни сақлаш вазирлиги хабар берди.
Маълум қилинишича, жорий йилнинг 22 май куни Балиқчи туманида яшовчи 50 ёшли Р.Р. Избоскан туманида яшовчи шериги 32 ёшли Б.Қ. билан биргаликда халқаро юк ташиш автомашинасида Россиядан Тошкент вилояти Қибрай тумани ҳудудидаги чегара-назорат постига етиб келган. Шу куннинг ўзида ўрнатилган тартиб бўйича постдаги Санитария-эпидемиология осойишталиги маркази ходимлари томонидан ҳар икки ҳайдовчидан коронавирус инфекциясига текширув учун намуна олинган. Эртасига, 23 май куни, Б.Қ.да гумон натижа қайд этилганлиги сабабли такроран таҳлил топширган, Р.Р.да эса касаллик аниқланмаган.
Лекин ҳайдовчилар белгиланган санитария қоидаларига риоя қилмасдан, чегара-назорат пости автотураргоҳидан уйига чиқиб кетган. Шундан сўнг ҳуқуқни муҳофаза қилувчи орган вакиллари билан ўтказилган тезкор қидирув ва эпидемиологик суриштирув натижасида ҳар икки ҳайдовчи ҳам ўз уйидан топилган.
Шу орада дастлаб таҳлил натижалари гумон қилинган Б.Қ.да ҳам, у билан доимий мулоқотда бўлган иккинчи ҳайдовчи Р.Р.да ҳам коронавирус инфекцияси тасдиқланган.
Эпидемиологик суруштирув натижасида Избоскан ва Балиқчи туманида Р.Р. ва Б.Қ. билан мулоқотда бўлган 100 нафарга яқин фуқаро 14 кунлик тиббий кузатувга олинган.
Таъкидланишича, ҳайдовчиларнинг эътиборсизлиги ва санитария қоидаларига риоя қилмаслиги уларнинг оила аъзолари, яқинлари, қўшнилари ва бошқа кўплаб инсонларнинг карантинга олинишига сабаб бўлган.
Аввалроқ Избосканда 23 май куни бир кишида коронавирус аниқлангани маълум қилинганди. Шунга қарамасдан, 25 май куни туманда оммавий тадбир ўтказилган. Туман Санитария-эпидемиология осойишталиги маркази бемор билан мулоқотда бўлган 51 киши карантинга олинганини маълум қилган. Уларнинг орасида оила аъзолари ҳам бор. Шу билан бирга, бемор билан алоқада бўлган 26 кишидан ҳам вирусологик таҳлил учун намуна олинган.
Изоҳ (0)