TikTok дастур ичида пул ишлаш борасида YouTube ва Netflix’ни ортда қолдирди

TikTok ва унинг Хитойдаги муқобили Douyin апрель ойида дастур ичидаги харидлар ҳисобига 78 миллион доллар даромад кўрди, деб ёзади Forbes.

Қайд этилишича, бу маълумот ўйин ва рекламалардан тушган фойдани ўз ичига олмайди.

2019 йилнинг апрели билан солиштирилганда икки дастурнинг даромади 10 бараварга ортган.

Дастур даромадининг 86,6 фоизини Хитой бозоридан, 8,2 фоизини эса АҚШдан олган.

TikTok ҳам, Douyin ҳам дастур ичидаги харидлар бўйича Google Play’даги энг яхши дастурлар ўнталигига кирмади, бироқ App Store’даги дастурлар орасида биринчи ўринни эгаллади.

YouTube ушбу рейтингда иккинчи ўринни эгаллади. Унинг даромади 76 миллион долларни ташкил этди. Бир йил ичида видеохостингнинг даромади 57 фоизга ошди.

TikTok’дан фарқли равишда сервисга дастур ичидаги харидлар бўйича даромадни АҚШ (56,4 фоиз) ва Япония (11 фоиз) фойдаланувчилари олиб келган.

Кучли бешталикка, шунингдек, Tinder, Disney+ ва Tencent Video видеосервиси киритилди. Netflix рўйхатда олтинчи ўринни эгаллади.