Xiaomi Mi Band 5 браслети: илк суратлар пайдо бўлди

Хитойнинг Weibo ижтимоий тармоғида бешинчи авлод Xiaomi Mi Band браслетининг илк суратлари пайдо бўлди.

Суратлардан кўриш мумкинки, қурилма 1,2 дюймли экранга эга бўлади — бундан олдинги моделники 0,95 дюймга тенг эди. Қолган жиҳатлари билан браслет ўзидан олдинги моделдан фарқ қилмайди.

Mi Band 5’нинг дисплейи ҳошияларнинг ингичкалаштирилиши ҳисобига катталашган, корпус эса аввалгидек қолган. Тахминларга кўра, олдинги моделнинг қувватлантириш адаптери ҳам унга мос келади.

Дисплей каттаришидан ташқари, Mi Band 5’да соғлиқни ва машғулотлар мониторингига бағишланган янги функциялар пайдо бўлган. Браслет қондаги кислород миқдорини ўлчай олади — бу фойдаланувчи нима сабабдан ўзини ёмон ҳис қилаётгани ва боши оғриётганини аниқлашга ёрдам беради. Шунингдек, аёллар менструал циклини кузатиши ҳам мумкин. Бундан ташқари, қурилмага машғулотларнинг яна беш тури қўшилади.

Mi Band 5 айнан қачон тақдим этилиши номаълум. Миш-мишларга кўра, бу Хитойда июнь ойида бўлиб ўтиши керак. Компания қурилманинг бошланғич нархини 179 юань (42 доллар) этиб белгилаган.