Ўзбекистон Президенти Шавкат Мирзиёев 25 май, душанба куни транспорт соҳасининг барқарор ишлашини таъминлаш ва изчил ривожлантириш масалалари бўйича йиғилиш ўтказди. Бу ҳақда Президент матбуот хизмати хабар берди.
Таъкидланишича, коронавирус пандемияси оқибатида бутун дунёда транспорт алоқалари деярли тўхтаб қолди. Соҳадаги компаниялар бундан жиддий зарар кўрмоқда. Масалан, биргина авиация тармоғида 2020 йил якунигача дунё бўйича 113 миллиард доллар йўқотилиши тахмин қилинмоқда.
Мамлакат транспорт корхоналари карантин чекловлари сабабли ҳозиргача 340 миллиард сўм зарар кўрган. Эпидемиологик вазият барқарорлашгунча бу рақамлар яна ошиши аниқ.
Шу боис соҳада пандемиянинг таъсирини юмшатиш, корхоналарни иқтисодий қўллаб-қувватлаш бўйича қатор чоралар кўрилмоқда. Карантиндан энг кўп зарар кўрадиган Uzbekistan Airways ва Uzbekistan Airports акциядорлик жамиятларининг 122 миллион доллар кредитлари тўлов муддатлари узайтирилди, 60 миллиард сўмлик солиқ имтиёзлари тақдим этилди. Инқирозга қарши курашиш жамғармасидан 50 миллион доллар миқдорида айланма маблағ сифатида фоизсиз ссудалар ажратилди.
Эслатиб ўтамиз, карантин сабабли Ўзбекистон 30 мартдан бошлаб хорижий мамалакатлар билан доимий авиақатновларни тўхтатган, бироқ Uzbekistan Airways хориждаги ўзбекистонликларни ватанга қайтариш бўйича чартер рейсларни амалга оширмоқда. Шунингдек, мамлакат ҳудудлари ўртасидаги темир йўл қатнови ҳам чекланганди. Карантин чораларини енгиллаштириш доирасида 18 майдан бошлаб Ўзбекистоннинг бир қатор шаҳарларига авиа ва темир йўл қатновлари қайта тикланди.
Изоҳ (0)