Ўзбекистон Давлат солиқ қўмитаси ҳузуридаги Малака ошириш маркази ходимида коронавирус инфекцияси аниқлангани ҳақида хабар берилган эди. Шунингдек, касалланган шахс билан ДСҚ ходимлари ҳам мулоқотда бўлган бўлиши мумкинлиги инобатга олиниб, қўмита марказий аппаратининг барча ходимлари COVID-19’га тест топшираётгани ҳам маълум қилинганди.
ДСҚ матбуот хизматининг маълум қилишича, 2020 йил 23 май куни Давлат солиқ қўмитаси марказий аппарати барча ходимларидан COVID-19’га тест таҳлиллари олинган.
Тест таҳлили натижаларига кўра, ДСҚ марказий аппаратида бирорта ҳам коронавирус инфекцияси билан зарарланиш ҳолати аниқланмаган.
«Давлат солиқ қўмитаси марказий аппарати барча ходимлари меҳнат қонунчилигига ва карантин талабларига қатъий риоя қилган ҳолда аввалги режимда ишлашни давом эттиради», — дейилади ДСҚ хабарида.
Аввалроқ Тошкентдаги «Ипотека банк» бош бошқармаси ходимида ҳамда ўзбекистонлик икки нафар божхоначида коронавирус аниқлангани ҳақида хабарлар берилганди.
Ўзбекистонда 25 май соат 16:30 ҳолатига кўра, коронавирус инфекцияси қайд этилганлар сони 3189 нафарни ташкил этмоқда. Ўзбекистонда жами соғайганлар сони 2607 нафарга етди. Мамлакатда 13 нафар бемор коронавирус инфекцияси асоратлари оқибатида вафот этган.
Изоҳ (0)