Андижон вилоятида 1579 нафар мактаб ўқувчиси 2019/2020-ўқув йилини олтин ва кумуш медаль билан тамомлади. Натижада вилоят ушбу кўрсаткич бўйича республикада биринчи ўринни эгаллади. Бу ҳақда вилоят халқ таълими бошқармасига таяниб «Дарё» мухбири хабар берди.
Вилоят халқ таълими бошқармаси бошлиғи Азизбек Миркомиловнинг маълум қилишича, ўтган ўқув йилида вилоятда 40 298 нафар йигит-қиз 11-синфни тамомлаган бўлса, уларнинг 936 нафари олтин, 643 нафари эса кумуш медалга лойиқ кўрилган.
«Жорий йилнинг 25—29 февраль кунлари Андижон вилояти ҳокимлиги, халқ таълими бошқармаси ҳамда Sharda университети ҳамкорлигида ўқувчи ёшларнинг билимларини халқаро талаблар доирасида синовдан ўтказиш, иқтидорли ўқувчиларни қўллаб-қувватлаш ва рағбатлантириш мақсадида математика, физика, кимё ва биология фанлари бўйича фан олимпиадаси ўтказилган. Унда вилоятдаги умумтаълим мактабларининг 9—11-синф битирувчиларидан 12 нафари 2—3 ўринларни эгаллаб, Sharda университетида таълим олиш учун имтиёзни қўлга киритган. Яна олти нафари эса юқори балл тўплаб университетга грант асосида ўқишга кириш имкониятига эга бўлган», — дейди Азизбек Миркомилов.
Вилоят халқ таълими бошқармаси бошлиғи ўринбосари Гулҳаё Омонованинг айтишича, ўқувчиларнинг олий таълим муассасаларига киришга бўлган қизиқишини аниқлаш мақсадида ўтказилган сўровномада битирувчиларнинг 27 минг нафардан зиёди келгусида ОТМларда ўқиш истагини билдирган.
Қўшимча қилишича, 2018/2019-ўқув йилида вилоятда 1392 нафар йигит-қиз олтин ва кумуш медални қўлга киритган.
«Дарё» мухбирининг аниқлик киритишича, жорий ўқув йилида республика бўйича 6901 нафар ўқувчига кумуш ва олтин медаль берилган бўлиб, шундан 2219 таси кумуш, 4682 таси олтин медаль ҳисобланади.
Изоҳ (0)