Ўзбекистондаги 4 та аэропортни давлат-хусусий шерикликка, Uzbekistan Airways’ни хорижий компания бошқарувига бериш режалаштирилмоқда

Ўзбекистон Президенти Шавкат Мирзиёев 25 май, душанба куни транспорт соҳасининг барқарор ишлашини таъминлаш ва изчил ривожлантириш масалалари бўйича йиғилиш ўтказди. Бу ҳақда Президент матбуот хизмати хабар берди.

Йиғилишда янгича шароит ва талаблар асосида транспорт соҳасининг барқарор ишлашини таъминлаш масалалари муҳокама қилинди.

Транспорт вазирлигига Uzbekistan Airways ва Uzbekistan Airports акциядорлик жамиятларини пандемия таъсиридан олиб чиқиш бўйича бизнес модель ишлаб чиқиш вазифаси қўйилди.

Европа—Хитой йўналишида юк ташиш бозорига кириш орқали қўшимча даромад олиш, жорий ва инвестициявий харажатларни оптималлаштириш бўйича топшириқлар берилди.

Рақобатни кучайтириш учун фуқаро авиацияси бозорига янги ташувчиларни жалб қилиш, Uzbekistan Airways’ни нуфузли хорижий компания бошқарувига бериш масаласи кўриб чиқилди.

Аэропортларни модернизация қилиш, Андижон, Бухоро, Урганч ва Қарши халқаро аэропортларини давлат-хусусий шерикликка бериш бўйича тендер эълон қилиниши белгиланди.

Эслатиб ўтамиз, «Ўзбекистон ҳаво йўллари» миллиай авиакомпанияси қайта ташкил этилиши натижасида унинг ўрнига учта аҳолида компания — Uzbekistan Airways, Uzbekistan Airports ва Uzbekistan Helicopters ташкил қилинган. Бундан ташқари, Ўзбекистонда яна бешта янги авиакомпания, хусусан, Humo Air авиакомпаниясини ташкил этиш ишлари олиб борилмоқда.

Шунингдек, 2019 йил 1 октябрдан бошлаб, Қарши, Нукус, Бухоро ва Термиз халқаро аэропортларида «Очиқ осмон» режими жорий этилган.