Американинг The New York Times газетаси 24 май кунги сонининг биринчи саҳифасини мамлакатдаги коронавирус қурбонларига бағишлаб, уларнинг фамилияларини чоп этди. Бу ҳақда нашр сайтида хабар берилди.
Газетанинг босма версияси «Қурбонлар сони 100 мингга яқинлашмоқда, мислсиз йўқотишлар» сарлавҳаси остида чиққан бўлиб, қисқа некролог ҳам чоп этилган. «Рўйхатда шунчаки исмлар эмас, бу — биз», — дейилади сарлавҳа остида.
Мақола муаллифларининг таъкидлашича, коронавируснинг АҚШга таъсирини рақамлар билан ўлчаб бўлмайди.
«Мамлакатда вирус оқибатида вафот этганлар сони даҳшатли 100 мингга яқинлашаётганида, The New York Times некрологларни ўрганиб чиқди ва одамларнинг ўлими ҳақида хабар берди. Мазкур минг киши — қурбонлар рўйхатининг бир фоизи, холос», — дейилади мақолада.
Шунингдек, журналистлар коронавирус оқибатида вафот этган минг кишининг ёши, яшаш жойи ва нима билан шуғулланганини қисқача эслаб ўтган. Биринчи саҳифада чоп этилган рўйхат газетанинг 22-саҳифасида давом этади.
«100 йилдан кейин ортга назар ташлаганимизда, қандай йўқотишларга дуч келганимизни тушунишимизни истардим», — дейди The New York Times муҳаррирларидан бири Марк Лейси.
22 май куни АҚШ президенти Дональд Трамп барча федерал бинолар ва миллий монументлардаги байроқларни коронавирус оқибатида вафот этган америкаликлар хотираси учун уч кунга тушириб қўйиш бўйича топшириқ берганди.
Жонс Ҳопкинс университети маълумотларига кўра, АҚШда коронавирусга чалинганлар сони 1,6 миллион кишидан ошган, ҳозирга қадар 97 087 киши вирус қурбонига айланган.
Изоҳ (0)