КХДР етакчиси Ким Чен Ин уч ҳафталик танаффусдан сўнг, яна жамоатчиликка кўриниш берди, деб ёзади Bloomberg.
Мамлакат етакчиси Корея Меҳнат партиясининг Марказий ҳарбий қўмитасида йиғилиш ўтказган. Йиғилишда миллий мудофаа кучларини мустаҳкамлаш борасидаги масалалар муҳокама қилинган. Шунингдек, Ким Чен Ин ички ва ташқи сиёсат воситалари ёрдамида ядровий урушдан сақланиш масаласини кўтарган.
Бироқ мажлис қайси санада ўтказилгани маълум қилинмаган. Корея марказий телеграф агентлиги Шимолий Корея етакчисининг суратини, шунингдек, 23 май куни имзоланган буйруқларни эълон қилган.
22 май куни Yonhap агентлиги Ким Чен Ин охирги уч ҳафтадан бери жамоатчиликка кўриниш бермагани ҳақида ёзганди. Жанубий Корея бирлашган вазирлик вакили Ё Санг-Ки ҳукумат қўшни давлатдаги вазиятни диққат билан кузатаётганини маълум қилган.
Эслатиб ўтамиз, апрель ойининг ўрталарида CNN телеканали АҚШ КХДР етакчиси Ким Чен Иннинг соғлиғи жарроҳлик амалиётидан сўнг ёмонлашгани тўғрисидаги разведка маълумотларини ўрганаётганини маълум қилганди. Daily NK’нинг ёзишича, Ким Чен Инда 12 апрель куни юрак-қон томир тизимига боғлиқ жарроҳлик амалиёти ўтказилган. Бироқ АҚШ президенти Дональд Трамп Ким Чен Иннинг соғлиғи ёмонлашгани тўғрисидаги маълумотлар хато эканлигини билдириб, CNN’га доим ҳам ишонавермаслигини айтган. 27 апрель куни Жанубий Корея президенти маслаҳатчиси КХДР етакчиси соппа-соғ эканлигини маълум қилган. 2 май куни эса Шимолий Кореяда ҳукмрон Меҳнат партиясининг матбуот органи бўлган Rodong Sinmun газетаси Ким Чен Иннинг ўғит заводи очилишида тушган фотосуратларини эълон қилганди.
Изоҳ (0)