2020 йилнинг 19 май куни Сергели туманидаги «А.Турбонов» ЙПХ постида хизмат олиб бораётган ички ишлар ходимлари шаҳардан чиқиб кетаётган Nexia автомобилини текширганда, унинг салонидан совуқ қурол ва тўппонча топилди. Бу ҳақда Тошкент шаҳар ИИББ ахборот хизмати хабар берди.
Маълум қилинишича, 19 май куни соат 21:30 атрофида шаҳарни тарк этаётган Nexia русумли автомобиль ЙПХ постида хизмат олиб бораётган ички ишлар ходимлари эътиборини тортган.
Машина тўхтатилганда ҳайдовчининг ўзини тутиши ходимларда шубҳа уйғотган. Бу эса автомобилни яхшилаб текширишга сабаб бўлган. Холислар иштирокида ўтказилган текширув натижасида автомобилда металл кастет ва тўппончанинг «Пугач» деб аталадиган тури топилган. Мазкур қуроллар автоулов ҳайдовчиси, Шайхонтоҳур туманида яшовчи 24 ёшли С.А.га тегишли эканлиги аниқланган.
Мазкур ҳолат бўйича текширишувни давом эттириш ва қуроллар эгасининг мақсад ва ниятларини аниқлаш учун С.А. ашёвий далиллар билан бирга Сергели туманидаги 4-сон ИИБга келтирилган.
Изоҳ (0)