«Гарри Поттер ва фалсафий тош» китобининг биринчи нашри аукционда 33 минг фунт стерлинг (40 минг доллар) эвазига сотилди, деб ёзади Esquire.

Фото: BBC

Оммабоп китобнинг ноёб нашри Британиянинг Бакингемшир графлигида яшовчи 65 ёшли ўқитувчи томонидан топиб олинди.

Аёл китобни 12 йил аввал мактабнинг орқа ҳовлисидаги чиқинди контейнеридан топганди. Унинг ёнида китобнинг яна иккита юпқа муқовали нашри бўлган.

Қолган иккита китоб 3000 ва 3400 фунт стерлингга сотилган.

«Хурсандман, десам ҳеч нарса демаган бўламан», — дейди китобни топиб олган ўқитувчи аёл.

Гарри Поттер ҳақидаги китоб илк марта 1997 йилда 500 нусхада сотувга чиқарилган. Китобларнинг аксарияти мактаб ва кутубхоналарга бепул тарқатилган.

2018 йилда ушбу нашрдаги китоб 56 минг фунт стерлингга (74 минг доллар) сотилганди.