Ўзбекистон халқ шоири, ўзбек болалар адабиётининг буюк намояндаси Анвар Обиджон 11 апрель куни вафот этди. У 73 ёшда эди. Унинг вафот этгани ҳақида хабардан сўнг, ижтимоий тармоқларда асосан адибнинг асарларини ўқиб вояга етган авлод вакиллари томонидан хотиралар, Анвар Обиджонга раҳматлар эълон қилинди.
Қаҳрамон Асланов: «Болалигимизнинг яна бир бўлаги бизни тарк этди»
Бир йилча олдин Хайрулла Ҳамидовнинг «Илдиз» лойиҳасида интервью берган Усмон Азим қизиқ ва жуда муҳим фикрни илгари сурганди. Худойберди Тўхтабоев ва Анвар Обиджон каби адибларни алоҳида эъзозлаш кераклигини таъкидлар экан, Усмон Азим бунинг сабабини қўйидагича изоҳлаган эди: «Айнан болалар адабиётида ижод қиладиган ёзувчи ва шоирларнинг ўрни бошқача. Чунки уларнинг асарлари туфайли инсон болалигидан китобга ошно тутинади. Китобхонларнинг пайдо бўлишида бу жуда аҳамиятли».
Ҳақиқатан ҳам, одатда севимли ёзувчилар ҳақида сўралганда каттароқ фикр юритгандек бўламиз. Айтматов деймиз, Маркес деймиз, худдики юқорида номлари тилга олинган болалар адибларининг асарлари анча жўн, содда кўринади. Аммо бу асарлар бизнинг биринчи муҳаббатимиз каби жуда қадрли — ҳаммамиз Ҳошимжонни, Мешполвонни, Том Соерни ўқиб катта бўлганмиз. Агар бу қаҳрамонлар, бу ёзувчилар бўлмаганда, ким билади, биз бу сеҳрли оламга, китобхонликка кирармидик ёки йўқ.
Аслида анча содда кўринган, оддий воқеаларни ёзиш яна-да қийин, ёш болалардек беғубор фикрлаш, воқеаларга улардек қарай олиш, хуллас, болаларни қизиқтириш осон иш эмас. Ахир Маркеснинг асарини бир китобхон қўлига олади, Анвар Обиджонни эса, эҳтимол, илк бор қўлига китоб ушлаб турган болакай... Маркес ёқмаса, ирғитиб, бошқа китобга ўтилади, Анвар Обиджон эса ўша янги ўқувчини шу оламда олиб қола билиш керак. Масъулият каттароқ.
Болалигимизнинг яна бир бўлаги бизни тарк этди. Ўзбекистон халқ шоири Анвар Обиджон вафот этди.
Битта шоир камайса нима,Чарх яратар бошқа нусхасин.Чўкиб кетса тўфонда кема,Пишиқроғин ясар устаси.
Тўфонлардан сесканма, қалбим,Қайиқлардек сузма қирғоқлаб.Кемаман деб уммонга талпин,Юз балога ўзингни чоғлаб.
© Анвар Обиджон
Инна лиллаҳи ва инна илайҳи рожиъун.
Азиза Қурбонова: «Барча яхши ва беғубор шеърлар ва асарлар учун катта раҳмат, Анвар Обиджон!»
Севимли ёзувчимиз, самимий ва боладек кўнгли тоза ижодкор, Ўзбекистон халқ шоири Анвар Обиджон вафот этибди. Инна лиллаҳи ва инна илайҳи рожиъун...
«Мешполвоннинг саргузаштлари» китобини болаликда ётиб олиб ўқиганман. Уста Гулмати саргузаштлари, ўша китобдаги қизиқарли мақолалар эсимда. Ўқувчилик пайтимда Алишер Навоий асарларига қизиқмасдим, дарсликлардаги баёнларга тушунмасдим. Аммо Анвар Обиджон унинг мисраларидаги «пайвандимни пайвандимга боғлангиз», «қизилу сориғу яшил» деган сўзларни «Навоий катта кашфиётчи бўлганда, сварка ҳақида гапирганмикин, светофор ҳақида айтмоқчи бўлганми», деган қизиқ гапларни қаҳрамонларига гапиртириб, бола ақлимни Алишер Навоийга қизиқтириб қўйганди...
Болалигим китоблари ёдга тушиб кетди. Барча яхши ва беғубор шеърлар ва асарлар учун катта раҳмат, Анвар Обиджон! Охиратингиз обод бўлсин!
Изоҳ (0)