Президент Шавкат Мирзиёев топшириғи асосида Ташқи ишлар вазирлиги тезкор штаби томонидан Россия ва Қозоғистоннинг тегишли органлари билан олиб борилган ҳамкорлик ишлари сабабли икки давлат чегарасида тўпланган фуқаролар Ўзбекистонга олиб келинадиган бўлди. Бу ҳақда Ўзбекистон ТИВ матбуот хизмати хабар қилган.

Кадр: YouTube

Мамлакатнинг Москва ва Остона шаҳарларидаги элчихоналари, Қозон ва Ақтау шаҳарларидаги Бош консулхоналари томонидан «Маштаково» назорат-ўтказиш пункти яқинида бўлиб турган Ўзбекистон фуқаролари рўйхати тузилди ҳамда ташкилий ва транспорт масалалари ҳал қилинди.

Ватанга мазкур рўйхатга киритилган жами 1100 нафар фуқаро олиб келинади. Хусусан, 2020 йил 18 май ва 19 май кунлари 550 нафардан фуқаронинг автобусларда Ўзбекистонга қараб йўлга чиқиши режалаштирилган. Улар етиб келишлари билан 14 кунлик карантинга жойлаштирилади.

ТИВ ахборотига кўра, фуқароларни Россия—Қозоғистон чегараси орқали Ўзбекистонга олиб келиш истисно тариқасида ва дипломатик ваколатхоналар томонидан аввалдан шакллантирилган рўйхат асосида амалга оширилмоқда. Қўшимча рўйхат тузиш кўзда тутилмаган.

Вазирлик Россия ҳудудида бўлиб турган фуқаролардан «Маштаково» назорат-ўтказиш пункти ёки бошқа Россия—Қозоғистон давлатлараро чегарасини кесиб ўтиш пунктларига боришга уринмасликни, ҳозирда бўлиб турган жойларида қолишини ва барча карантин чораларига қатъий риоя қилишни сўраган.

Ташқи ишлар вазирлиги ўзбекистонликларни Қозоғистон ҳудуди орқали Ўзбекистонга олиб келишнинг қайта бошланиши тўғрисида қўшимча маълумот берилишини билдирган.

Эслатиб ўтамиз, 7 май куни ўтказилган видеоселекторда Шавкат Мирзиёев Россия, Туркия, БАА ва бошқа давлатларда оғир вазиятга тушиб қолган 11 минг нафар фуқаро Ўзбекистонга қайтарилишини айтганди.

Ўзбекистоннинг Москвадаги элчихонаси Россияда бўлиб турган 65 минг нафар фуқаронинг қайтиш истагида эканини билдирган ҳолда онлайн-сўров билан мурожаат этганини маълум қилган.

Мавзуга доир: