Ижтимоий тармоқларда ўзбек миллати ва давлат тилини ҳақорат қилган самарқандлик 15 суткага қамалди. Бу ҳақда «Дарё»га Самарқанд шаҳар Маъмурий суди раиси Ориф Пардаев маълум қилди.
Самарқанд вилоятининг Тойлоқ туманидаги маданият бўлимида ишлаб келган фуқаро Д.Я. жорий йил 15 май куни Facebook ижтимоий тармоғидаги «Халқ фикри» гуруҳида изоҳ қолдириб, ўзбек тили ва миллатини камситган.
Фуқаро, шунингдек, ушбу ҳолатга аниқлик киритиш мақсадида яшаш уйига борган ИИБ ходимларига қаршилик кўрсатиб, ходимларнинг қонуний талабини бажармаган.
Бугун, 18 май куни фуқаро ишини кўриб чиққан Самарқанд шаҳар Маъмурий суди уни Маъмурий жавобгарлик тўғрисидаги кодекснинг 42-моддаси (Давлат тили тўғрисидаги қонун ҳужжатларини бузиш), 194-моддаси 1-қисми (Ички ишлар органлари ходимининг қонуний талабларини бажармаслик) ва 195-моддаси (Ички ишлар органлари ходимларининг ўз хизмат бурчларини бажаришларига қаршилик кўрсатиш) билан айбли деб топиб, унга 15 сутка қамоқ жазосини тайинлади.
Изоҳ (0)