АҚШ президенти Дональд Трамп Америка компаниялари коронавирусга қарши вакцинани ишлаб чиқса, мамлакатнинг уни хориждаги бошқа давлатларга пуллаб даромад қилмоқчи эмаслигини маълум қилди. У бу ҳақда махсус брифингда айтган, дейилади The Independent хабарида.
Трампнинг сўзларига кўра АҚШ бошқа давлатларга вакцинани муқобил нархларда таклиф қилади, сабаби вакцина устида ишлаётган компанияларнинг мақсади даромад кўриш эмас.
«Одамлар жавоб топишни истамоқда, улар фойда кўриш ҳақида ўйлаётгани йўқ», — деган Трамп.
Америка етакчиси коронавирусга қарши вакцина биринчи бўлиб Хитойда ишлаб чиқилса ҳам, АҚШ уни олиш имкониятига эга эканини қайд этди. Трампнинг айтишича, бу борада кўплаб мамлакатлар ўзаро ҳамкорликда иш олиб бормоқда.
«Бу масалага бир томонлама ёндашиш нотўғри, ҳамма бир бўлиб меҳнат қилмоқда», — деган у.
Мавзуга доир: Трамп Хитой АҚШдан коронавирус вакцинаси ҳақидаги маълумотларни ўғирлашга уринаётганини билдирди
Май бошида Трамп АҚШда коронавирусга қарши вакцинанинг қачон пайдо бўлиши ҳақида гапирган ва америкалик олимларнинг COVID-19 билан кураша оладиган вакцина 2020 йил охиригача яратишини тахмин қилган.
Жонс Ҳопкинс университети тақдим қилган статистик маълумотларга кўра, бутун дунёда коронавирус инфекциясига чалиниш ҳолатлари сони 4,5 миллиондан ошган, 304,8 минг киши COVID-19 асоратлари оқибатида ҳаётдан кўз юмган.
АҚШда эса COVID-19 билан касалланганлар сони 1,4 миллиондан ошиб, 86,4 мингдан ортиқ бемор коронавирусдан вафот этган.
Изоҳ (0)