Жонс Ҳопкинс университети тақдим қилган статистик маълумотларга кўра, бутун дунёда коронавирус инфекциясига чалиниш ҳолатлари сони 4,5 миллиондан ошган, 304,8 минг киши COVID-19 асоратлари оқибатида ҳаётдан кўз юмган.
Энг кўп касалланиш ҳолатлари АҚШда кузатилган. Мамлакатда 1 миллион 427 минг кишида коронавирус инфекцияси борлиги аниқланган, 86,3 минг бемор касаллик оқибатида вафот этган.
2-ўриндаги Россияда 262,8 минг нафар кишида коронавирус инфекцияси борлиги қайд этилган. Учинчи ўринда Буюк Британия бормоқда, қиролликда 238 минг киши COVID-19 юқтириб олган.
4 май куни коронавирус билан касалланганлар сони дунё бўйича 3,5 миллиондан ошгани маълум қилинган эди. Вирусни юқтириб олганлар сони 10 кун ичида қарийб 1 миллионга кўпайган. Аввал умумий касалланганлар сонига бир миллион нафар киши қўшилиши учун ўрта ҳисобда икки ҳафта (21 апрелда 2,5 миллион киши) вақт талаб қилинганди.
Ўлимлар кўрсаткичи бўйича 300 минг кишининг вафот этгани 14 майга, 200 минг беморнинг ўлгани 25 апрелга (19 кун) ва 100 минг та ўлим ҳолати 10 апрелга (15 кун) тўғри келди.
Университет статистик маълумотлари бўйича бутун дунёда касалланиш ҳолатлари сони кескин ўсиб бормоқда, ўлимлар бўйича кўрсаткич эса аксинча сустлашган.
Коронавирус тарқала бошлаганидан бери ўтган давр мобайнида 1,6 миллион киши инфекциядан тўлиқ тузалган.
Изоҳ (0)