Тўғон ёрилиши оқибатида Сардоба, Мирзаобод ва Оқолтин туманларидаги 4,3 мингдан ортиқ хонадон зарар кўрган

«Юксалиш» умуммиллий ҳаракати Сардоба сув омборида юзага келган тошқин оқибатлари ва уларни бартараф этиш бўйича амалга оширилаётган ишлар ҳақида маълумот берди.

Таъкидланишича, сув тошқинидан Сардоба, Мирзаобод ва Оқолтин туманларидаги 10 та МФЙда (25 та аҳоли пункти) дастлабки маълумотларга кўра, 4 351 та хонадон зарар кўрган. Хонадонлардан 2 570 таси яроқсиз ва 1 781 тасига қисман зарар етган.

Шунингдек, ҳозирга қадар йўқолган ҳужжатлар, банк кредит қарздорликлари ва пенсия тўловлари бўйича амалга оширилган ишлар бўйича ҳам маълумот берилди:

• 834 нафар фуқаронинг биометрик паспорти, 574 та туғилганлик ва 4 та ўлим ҳақида, 220 та никоҳ гувоҳномаси тикланган;
• талафот кўрган 13 383 та аҳоли ва тадбиркорлик субъектларининг 655 миллиард сўмлик кредитларининг 186,2 миллиард сўмини қайтариш муддати 6 ойгача узайтирилди;
• жами 5549 нафар пенсионернинг 3,9 миллиард сўмлик пенсия пуллари Халқ банки филиаллари томонидан нақд пул шаклида тўлиқ етказиб берилиши таъминланган;
• экиш имконияти мавжуд майдонларга 1 миллион дона сабзавот кўчатларини экиш ишлари бошланди. Ҳозирга қадар 80 гектар томорқа майдонлари экилди;
• тирик ҳолда топилган 5160 та йирик ва майда шохли қорамоллар, отлардан 5143 таси ўз эгаларига қайтарилди ва эгаси аниқланмаган 17 таси сақловга олинди.