AQSh yollanma jangarilarning Venesuelaga bostirib kirishga urinishiga aloqador emas, dedi AQSh davlat kotibi Mayk Pompeo jurnalist Ben Shapiroga bergan intervyuda. “RBK”ning xabar berishicha, suhbat matni Davlat departamenti saytida e’lon qilingan.
“Buni biz boshqarmaganmiz. (Venesuele prezidenti Nikolas) Maduro esa buni aynan shunday ko‘rsatmoqchi ekanligini bilaman”, — degan Pompeo. Uning aytishicha, bu vaziyatda Maduroni jabrlanuvchi sifatida ko‘rsatishga urinish xato. Shuningdek, Maduro bosqinchilik haqida oldindan bilgan va bu vaziyatdan AQShni ayblash uchun foydalangan bo‘lib chiqsa, bundan ajablanmasligini aytgan.
Venesuelada yuz bergan voqealarga AQShning aloqador emasligini, shuningdek, Milliy Xavfsizlik Kengashi ham e’lon qilgan. “AQSh hukumati yaqinda Venesuelada ro‘y bergan voqealarga hech qanday aloqador emas. Buning aksi ta’kidlanayotgan bayonotlar ishonchli emas. Agar bu giyohvand moddalar savdosida ayblangan Maduro aytayotganidek AQSh tomonidan rejalashtirilgan operatsiya bo‘lganida, u ochiq, to‘g‘ridan to‘g‘ri va samarali bo‘lar edi”, — deb ta’kidlangan ularning bayonotida.
Venesuela Ichki ishlar vazirligi 3-may kuni xavfsizlik kuchlari La Guayra sohiliga qurollangan yollanma jangarilar guruhining kirib kelishining oldini olganini ma’lum qilgan edi. Unda aytilishicha, ular terakt sodir etib, hukumat rahbarlarini o‘ldirish va davlat to‘ntarishini amalga oshirishni rejalashtirgan.
Maduroning so‘zlariga ko‘ra, yollanma jangarilarning asosiy vazifasi uni o‘ldirish bo‘lgan. Ular Kolumbiyada tayyorlangan, hukumat esa AQSh hukumati yordami bilan ularni moliyalashtirgan.
Kolumbiya Tashqi ishlar vazirligi, o‘z navbatida, mamlakatning Venesuelaga harbiy-dengiz bosqinchiligiga urinishga aloqadorligini rad etgan.
Maduro bosqinchilik urinishida ishtirok etgan 13 kishi qo‘lga olingani, ulardan ikkita nafari AQSh prezidenti Donald Trampning xavfsizlik xizmati xodimlari ekanligini ma’lum qilgan. 6-may kuni Venesuela hukumati videolavha e’lon qilgan bo‘lib, unda qo‘lgan olingan AQSh fuqarolaridan biri so‘roq paytida uning guruhi Karkas aeroportini egallab olishni rejalashtirganini aytgan.
Keyinchalik Maduro Kolumbiyadan jangarilarning Venesuelaga bostirib kirishi uchun javobgarlik AQShning muvaqqat ishonchli vakili Jeyms Stori zimmasida ekanligini aytdi. Uning aytishicha, Stori Venesueladan haydalganidan so‘ng, u Kolumbiya poytaxti Bogotaga joylashgan.
Izoh (0)