Андижон вилоятида 99 ёшли Билолиддин бобо Асқаровнинг уруш қатнашчиси эканлиги шу кунгача тан олинмаганди. Бобо набираларининг сўровига жавобан Россия президентидан келган ҳужжатларда отахон 1941—1942 йилларда урушда бўлганлиги тасдиқланди. Бу ҳақда «Дарё» мухбири Умиджон Мамарасулов хабар берди.
Отахоннинг набираси Муфаззалшо Муҳаммадиевнинг айтишича, бобосининг урушда қатнашганини исботлаш мақсадида улар 30 йил ҳаракат қилган. Бироқ шу кунга қадар ҳеч қандай натижа бўлмаган.
9 май куни Муфаззалшо Муҳаммадиевга Россиядан Telegram орқали келган хабарда бобосининг урушда қатнашганини исботловчи ҳужжатлар топилганлиги маълум қилинган.
«30 йилдан буён бобомнинг урушда қатнашганини исботлашга ҳаракат қилардик. Бир неча маротаба шаҳар ҳокимлиги ва вилоят мудофаа бошқармасига ҳам мурожаат қилдик. Аммо натижа бўлмагач, 2016 йилда чиқмаган жондан умид деб, Россия Федерацияси президенти номига ёрдам сўраб хат юборгандик. Орадан тўрт йил ўтиб, бугун — 9 май куни электрон почта орқали хатга жавоб келди. Хатда бобомнинг 1941—1942 йилларда урушда қатнашганини тасдиқловчи ҳужжатлар илова қилинган. Ҳужжатларни топишда Москвадаги ҳамкасбларим ёрдам беришди. Барчасидан миннатдорман», — дейди Муфаззалшо Муҳаммадиев.
Маълум бўлишича, ушбу маълумотлар Россия Федерацияси Мудофаа вазирининг 2007 йил 8 майдаги буйруғига асосан барча архив ҳужжатлари ошкор қилингандан сўнг эълон қилинган.
Изоҳ (0)