Ўзбекистон халқ артисти Юлдуз Усмонова Instagram саҳифаси орқали видеомурожаат йўллаб, жаҳл устида айтган сўзлари учун ҳаммадан кечирим сўради.
«Менинг аччиғим келган пайтлар бўлди, аччиқ устида ўйламай гапирган гапларим бўлди. Рўза-ю Рамазон кунларида ҳаммадан узр сўрамоқчиман. Улуғ айём кунларида мендан дилинглар оғримасин. Ҳамма жонини жабборга бериб ишлаётган ҳарбийлардан узр сўрайман. Ҳеч қайси давлатда халқ билан давлат бунақа бирлашмаган. Хавотир, халқнинг мулки омонат бўлгани учун ҳаммаси бир бўлиб, битта портлади. Яна бир бор айтаман, меҳнат қилаётганлардан мен узримни сўрайман. Жонини жабборга берган одамларнинг ота-онасидан ҳам узр сўрайман. Ватанга келган оғир кунларда халқимиз билан елкама-елка хизматни қилайлик. Шу балолардан чиқиб олайлик, вақт ўтиб, вақт ҳаммасини ўз ўрнига қўяди. Хато қилганимни бўйнимга оламан. Хафа бўлманглар улуғ айём кунларида. Ҳаммамиз бир ёқадан бош чиқарамиз, хафагарчиликни унутамиз, деган умиддаман», — дейди Юлдуз Усмонова.
Эслатиб ўтамиз, Ўзбекистон халқ артисти Юлдуз Усмонова Instagram’да жонли эфирга чиқиб, ички ишлар ходимларини ҳақоратлаганидан сўнг, ижтимоий тармоқлар фойдаланувчиларининг танқидлари остида қолди.
Тошкент шаҳар ИИББ хонанданинг қилмиши юзасидан суриштирув бошланганини билдирди. Юлдуз Усмонова эса «ҳеч нарсадан хавотир олмаётгани, ҳамма нарса Оллоҳдан экани»ни айтди. Кейинроқ хонанданинг иши судга оширилгани, бироқ хонанда суд мажлисига келмагани хабар қилинди.
Олий суд эса иш бўйича ҳужжатлар судга келиб тушмаганини маълум қилди.
