Юлдуз Усмонова уйи олдида Сардобадаги тошқиндан жабрланганлар учун инсонпарварлик ёрдами тўпламоқда

Ўзбекистон халқ артисти Юлдуз Усмонованинг хонадони олдида 1 май куни Сирдарё вилоятининг Сардоба сув омборида рўй берган авариядан жабрланганлар учун инсонпарварлик ёрдами тўпланмоқда.

Юлдуз Усмонованинг Instagram саҳифасида инсонпарварлик ёрдамини тўплаш жараёни жонли эфирда намойиш этилмоқда.

Тошкент шаҳрининг турли бурчакларидан келган одамлар пул, рўзғор буюмлари ва кийим-кечаклар ташлаб кетмоқда. Жонли эфирдаги кадрлардан Юлдуз Усмонова хонадонининг ташқари ҳовлиси кийим-кечак ва турли буюмларга тўлиб кетганини кўриш мумкин.

Хонанданинг ўзи пул маблағларини санаб олиб, хайрли ишга қўл урганларнинг ҳар бирининг исмини ёзиб олмоқда.

Хонанданинг мухлислари унинг қилаётган ишини олқишлаган. Инсонпарварлик ёрдамини юборишга қарор қилганларнинг аксарияти хонанданинг жонли эфирини кўрганидан сўнг унинг хонадонига ошиққанини айтган.

Шунингдек, Маданият вазири Озодбек Назарбеков барча санъаткорларни сардобаликларга ёрдам беришга чақирган. Озодбек Назарбеков 5 май куни вазирлик ташаббуси билан Сардоба тумани томон инсонпарварлик карвони йўлга чиқишини маълум қилган.

https://www.instagram.com/p/B_rgrpJHB7E/