Исландияда коронавирус тарқалиши деярли йўқ қилинди, деб хабар бермоқда «РИА Новости». Ҳукуматнинг 6 май куни берган маълумотларига кўра, коронавирусга чалинганларнинг 97 фоизи соғайган.
«Исландияда COVID-19 учун тест натижаси ижобий чиққан 1799 кишидан 1750 нафари вирусдан халос бўлди. Афсуски, касаллик ўнлаб кишилар умрига зомин бўлди», — дейилади ҳукумат баёнотида.
Қайд этилишича, айни пайтда мамлакатда касалланган 39 киши қолган, уларнинг 3 нафари касалхонада, лекин уларнинг соғлиғига жиддий хавф йўқ.
Мамлакатда 4 майдан бошлаб 16 мартда жорий этилган чеклов чораларини бекор қилиш бошланган.
Аввалроқ Вьетнамда апрель ойи охирларида бир ҳафта давомида коронавирусга чалиниш бўйича бирорта ҳолат қайд этилмагани учун мамлакатда жорий этилган чеклов чораларини бекор қилиш бошлангани ҳақида хабар берилганди.
Европанинг бир неча давлатлари ҳам яқин кунларда карантин чораларини бекор қилишга тайёрланмоқда. Италия 4 майдан карантин чеклов чораларини енгиллаштиришни бошлади. Франция 11 майдан карантинни бекор қилишни режалаштирган бўлса, Бельгияда шу куни дўконлар очилишни бошлайди, мактаблар эса кейинроқ ишга тушади.
Австрияда 1 майдан бошлаб изоляция режими бекор қилинди. Чехия Европада биринчилардан бўлиб чегараларини очиб, фуқароларга чет элга чиқишга рухсат берди.
Туркиядаги барча асосий саноат корхоналари 11 май кунидан бошлаб ўз фаолиятини қайта йўлга қўяди. Москвада 12 майдан саноат корхоналари фаолиятини қайта бошлайди, лекин бошқа чекловлар ўз кучида қолади.
Ўзбекистонда эса 7 май куни Республика махсус комиссиясининг карантин чекловларини босқичма-босқич юмшатиш бўйича ахбороти эълон қилинди.
Изоҳ (0)