2019-yilda AQSh tomonidan Iroq, Suriya, Afg‘oniston va Somalida o‘tkazilgan harbiy operatsiyalar oqibatida 132 nafar tinch aholi halok bo‘lgan va yana 91 kishi jarohat olgan. Bu haqda Amerika Mudofaa vazirligining hisobotida so‘z boradi.
Pentagon ma’lumotlariga ko‘ra, Iroq va Suriyada IShID terrorchilik harakatiga qarshi o‘tkazilgan operatsiyalar vaqtida 22 kishi halok bo‘lgan va 13 kishi jarohat olgan. Afg‘onistonda 108 nafar tinch aholi halok bo‘lgan, 75 kishi jarohat olgan. Somalida esa — 2 kishi o‘ldirilgan va 3 kishi yaralangan.
“Qurolli kuchlarimiz ushbu mojarolarda tinch aholiga zarar yetkazmaslik uchun misli ko‘rilmagan choralarni ko‘rgan bo‘lsa-da, ba’zan AQSh tomonidan o‘tkazilgan harbiy amaliyotlar bexosdan begunoh fuqarolarning jarohatlanishi va o‘limiga olib kelishini tan olamiz”, — deyiladi Pentagon hisobotida.
6-may kuni AQSh prezidenti Donald Tramp Kongressning mamlakat qurolli kuchlarini Eronga qarshi ishlatish borasida prezident vakolatini cheklovchi rezolyutsiyasiga veto qo‘ygan edi. Amerika yetakchisining so‘zlariga ko‘ra, ushbu rezolyutsiya “AQSh va uning ittifoqdoshlari hamda hamkorlarini himoya qilish” imkoniyatini cheklashi mumkin. Trampning ma’lum qilishicha, Konstitutsiyaga ko‘ra prezidentda javob harakatlar borasida tezda qaror qabul qilishi uchun raqiblarning qadamlarini oldindan ko‘ra bilish imkoniyati bo‘lishi kerak.
Avvalroq AQSh Suriyada arablardan iborat maxsus bo‘linmalarni tuza boshlagani haqida xabar berilgandi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)