6 май куни Ўзбекистон Президенти Шавкат Мирзиёев Туркманистон президенти Гурбангули Бердимуҳамедов билан телефон орқали суҳбатлашгани ҳақида хабар берилганди. ТDH давлат ахборот агентлигининг маълум қилишича, суҳбат давомида Бердимуҳамедов Ўзбекистонга ёрдам кўрсатишга тайёр эканлигини билдирган.

Фото: Sputnik

Таъкидланишича, президент Бердимуҳамедов табиий офат оқибатида катта зарар кўрган Ўзбекистон халқига ҳамдардлигини билдирган, шунингдек, у Туркманистон томони ўз техника ва ходимларини жабр кўрган минтақага юбориб, ҳудуд инфратузилмасини қайта тиклашда зудлик билан ёрдам беришга тайёр эканлигини маълум қилган.

Президент Мирзиёев таклифни қабул қилган ёки қилмаганига аниқлик киритилмаган.

Фурсатдан фойдаланиб, икки давлат раҳбари Иккинчи жаҳон урушидаги ғалабанинг 75 йиллиги муносабати билан бири-бирини қутлаб, уруш қатнашчиларига сиҳат-саломатлик, бахт ва узоқ умр тилаган.

Эслатиб ўтамиз, 27 апрель куни Туркманистоннинг Лебоп вилоятига ёпирилган кучли шамол ва ёғингарчилик оқибатида кўплаб уйлар зарар кўрган эди. Туркманобод ва бошқа айрим ҳудудлар аҳолиси ўз уйлари ва инфратузилмасини мустақил қайта тиклашга уринмоқда.

Давлат ахборот нашрларида содир бўлган воқеа ҳақида ҳеч нарса дейилмаган. Фақат орадан бир ҳафта ўтгач минтақавий янгиликлар сайти вилоятдаги ишлар қайта бошлангани ҳақида ёзган.

6 май куни Туркманистон президенти вилоят раҳбарлари билан йиғилиш ўтказган. Бердимуҳамедов Лепоб вилояти ҳокимига янги қурилаётган объектлар ва қишлоқ хўжалиги ишларини қаттиқ назорат остига олишни буюрган. Вилоятда вайрон бўлган инфратузилмаларни қайта тиклаш ҳақида президент ҳам, ҳоким ҳам бир оғиз гап айтмаган.

Маълумот учун, Шавкат Мирзиёев 2 май куни Қозоғистон президенти Қосим-Жўмарт Тўқаев билан телефон орқали бўлиб ўтган мулоқотда Сардоба сув омборида юз берган ҳолатни муҳокама қилганди. Қирғизистон президенти Сўронбой Жээнбеков билан ҳам Сардобадаги фавқулодда вазиятни муҳокама қилган эди.