Германия ҳукумати май ойининг иккинчи ярмидан бошлаб Бундеслига мавсумини қайта тиклашга рухсат берди.
Лига раҳбарияти мавсумни қайси санада бошлашни ўзи хал қилади. Бу 15 май ёки 22 май бўлиши мумкин. Bild нашрининг хабарига кўра, навбатдаги тур ўйинлари катта эҳтимол билан 15 майда бошланади.
Германия канцлери Ангела Меркель иштирокидаги вазирлар йиғилишида футбол чемпионатини қайта тиклаш масаласи мактаб ва мактабгача таълим соҳасига боғлиқ масалалардан узоқроқ вақт муҳокама қилинган.
Мавсумни эрта қайта тиклаш борасидаги қарорга Бремен ҳудуди вакиллари қарши чиққан. Бундеслигада Бремен шаҳрининг «Вердер» жамоаси ҳаракат қилади.
Биринчи ва иккинчи Бундеслига баҳслари 26-турдан старт олади. Мазкур турда «Боруссия Д» ва «Шальке-04» ўртасидаги Рур дербиси бўлиб ўтади. Барча учрашувлар томошабинларсиз ўтади.
7 май куни дастлабки икки дивизоннинг 36 клуби вакиллари иштирокида мажлис ўтказилади. Унда мавсумни қайта тиклаш режаси борасида якуний қарор қабул қилинади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)