Америкада 5 ёшли бола ота-онасининг машинасини ҳайдаб чиқиб, ўзига Lamborghini харид қилишга йўл олди

Американинг Юта штати полицияси ота-онасининг машинасини ҳайдаб қочиб, ўзига Lamborghini сотиб олиш учун Калифорнияга кетаётган беш ёшли болани тўхтатди, деб ёзади Motor.

Қайд этилишича, боланинг ёнида автомобиль харид қилиш учун уч доллар бўлган.

Бола онасидан унга машина сотиб олиб беришни сўраган, она эса унинг талабини рад этган. Бундан хафа бўлган бола машинани ўзи сотиб олишга қарор қилган.

Полициячи Рик Морган трассада жуда секин ҳаракатланаётган машинани кўриб, уни имконияти чекланган одам ҳайдаётганлигини тахмин қилган. Полициячи махсус сигнални ёқиб, машинага тўхташ ишорасини берган, бироқ у тўхтамаган. Шунда Морган Dodge автомобилини таъқиб қила бошлаган. Натижада ҳайдовчи машинани тўхтатган.

https://twitter.com/UTHighwayPatrol/status/1257388985002930178

Шундан сўнг машина рулида беш ёшли бола ўтиргани ойдинлашган. У ўзини Адриан деб таништирган. Морган боланинг ота-онасига қўнғироқ қилган. Улар шу заҳотиёқ етиб келган.

Аниқланишича, Адриан ота-онаси ишдалигида унга қарайдиган опаси ухлаб ётганидан фойдаланиб, машинани ҳайдаб йўлга чиққан.

Боланинг ота-онаси уни ҳеч қачон рулга ўтқазмаслиги, машина ҳайдашни ўргатмаганлигини айтган. Улар бола қандай қилиб машинани ҳайдашни ўрганиб олганидан ҳайратда эканлигини билдирган.