Сардоба сув омборидаги сув тошқини оқибатида Қозоғистоннинг Туркистон вилояти Мақтаарал тумани ҳудудида техноген хусусиятга эга фавқулодда ҳолат эълон қилинди. Туркистон вилояти ҳокимлиги матбуот хизматининг хабар беришича, бунга чегарадаги коллекторлар сувга тўлгани сабаб бўлган.

Фото: Туркистон вилояти Полиция департаменти матбуот хизмати

Тошқин оқибатларини бартараф этиш учун сув оқимлари Оқолтин тумани ҳудудидан ўтувчи Абай каналига туширилиб, Жиззах вилоятидаги Арнасой кўлига йўналтирилганди. Туркистон вилояти ҳокимлиги хабарида айтилишича, оқибатда Мақтаарал вилоятининг чегара коллекторлари сув билан тўлган. Сув оқими секундига 180 кубометр бўлгани туфайли коллектордан сув тошиб, Жанажол қишлоқ округига қарашли Женис ва Энбекши қишлоқ округига қарашли Жанатурмис шаҳарчасида сув тошқини хавфи пайдо бўлган.

Туркистон вилояти Полиция департаменти матбуот хизматининг хабарига кўра, вилоятнинг 5 мингдан ортиқ қишлоқ аҳолиси сув тошқини хавфи туфайли уйларини тарк этди. Айримлари ўзлари тарк этган бўлган бўлса, қолганларига эвакуация қилишда ёрдам берилган. Ҳуқуқ-тартибот органлари ходимлари жамоат тартибини ва фуқаролар хавфсизлигини таъминлаш чораларини кўрмоқда.

Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори дамбасининг 6-пикет деворида сув чиқиши юзага келганди. Оқибатда Сардоба тумани Қўрғонтепа аҳоли яшаш пунктига сув кирган. Сув омбори тўғони бузилиб, сув тошиб чиқишига кучли ёмғир ва шамол сабаб бўлган.