Тошкентда 2 май куни Вирусология илмий-текшириш институти клиникасидан коронавирусга чалинган 8 нафар, Эпидемиология, микробиология ва юқумли касалликлари илмий-текшириш институти клиникасидан ҳам 8 нафар бемор соғайиб, реабилитацияга кузатилди, дея хабар бермоқда Соғлиқни сақлаш вазирлиги.
Вирусология илмий-текшириш институти клиникасидан соғайиб чиққанларнинг икки нафари эркак, олти нафари аёл; етти нафари Тошкент шаҳридан, бир нафари Тошкент вилоятидан. Улар касалликни коронавирусга чалинганлар билан мулоқотда юқтириб олган; энг каттаси 60 ёшда, энг кичиги 12 ёшда.
Эпидемиология, микробиология ва юқумли касалликлари илмий-текшириш институти клиникасидан соғайиб чиққанларнинг 4 нафари эркак, 4 нафари аёл; 5 нафари Тошкент шаҳридан, 2 нафари Фарғона вилоятидан, 1 нафари Тошкент вилоятидан. Уларнинг 7 нафари коронавирусга чалинганлар билан мулоқотда касалликни юқтириб олган, бир нафари эса Туркиядан чартер рейс орқали келган, коронавирус аниқлангач, клиникага ётқизилган; энг каттаси 34 ёшда, энг кичиги 3 ёшда.
Шундай қилиб, Тошкент шаҳрида коронавирусдан соғайганлар сони 409 нафарга, Ўзбекистон бўйича эса 1271 нафарга етди. Соғлиқни сақлаш вазирлигидан маълум қилишларича, биргина 2 майнинг ўзида Ўзбекистонда 59 нафар бемор коронавирусдан соғайди — аввалроқ Наманганда 17 нафар, Тошкент шаҳрида 13 нафар, Қорақалпоғистонда саккиз нафар, Хоразмдан уч нафар, Андижонда икки нафар бемор соғайгани ҳақида хабар берилган эди.
Айни вақтда, 2 май соат 10:00 ҳолатига кўра Ўзбекистонда коронавирус инфекциясини юқтириб олиш билан боғлиқ жами 2094 та ҳолат қайд этилган, беморларнинг тўққиз нафари вафот этган.
Изоҳ (0)