Тошқиндан жабрланган сардобаликлар учун Қашқадарёдан инсонпарварлик ёрдами йўлга чиқди

Сирдарё вилоятининг Сардоба тумани аҳолиси учун мўлжалланган инсонпарварлик ёрдами Қашқадарё вилоятидан йўлга чиқди, дея хабар беради «Дарё» мухбири.

Қашқадарё вилоят ҳокимлиги ахборот хизмати раҳбари Аҳрор Содиқовнинг «Дарё»га маълум қилишича, сардобаликлар учун инсонпарварлик ёрдами сифатида 15 тонна ун, 1 тонна ёғ, 500 кг шакар, 500 кг гуруч, 500 кг макарон, 1,5 тонна димланган консерва гўшт маҳсулотлари, 1500 кг болалар пюреси, 750 кг қандолат маҳсулотлари юборилган.

Эслатиб ўтамиз, бундан аввал Самарқанддан Сардоба туманига махсус ёрдам гуруҳи юборилгани хабар берилганди.

1 май куни соат 05:55 да Сирдарё вилоятида жойлашган Сардоба сув омбори дамбасининг 6-пикет деворида сув чиқиши юзага келган. Натижада Сардоба тумани Қўрғонтепа аҳоли яшаш пунктига сув кирган. Бунда, асосан, сув экин майдонларига зарар етганлиги маълум бўлганди.

Айни дамда тумандаги «Деҳқонобод», «Бахмал», «Тинчлик», «Хазина», «Ишонч», «Тадбиркор», «Орзу», «Аҳиллик», «Туркистон» МФЙларида истиқомат қилувчи фуқаролар 1400 дан зиёд эвакуация қилинган аҳолига ўз уйларидан бошпана ажратмоқда.